16 жніўня, Мінск /Кар. БЕЛТА/. Брэст і Віцебск прымуць стартавыя сустрэчы 18-га тура футбольнага чэмпіянату Беларусі сярод каманд вышэйшай лігі, паведамляе карэспандэнт БЕЛТА.
У першай з іх брэсцкія дынамаўцы згуляюць на сваім полі з салігорскім "Шахцёрам" (пачатак у 19.00). У гульні першага круга ў Салігорску брастаўчане атрымалі перамогу з буйным лікам 4:0. У папярэднім туры дынамаўцы абыгралі на выездзе футбалістаў "Смаргоні" - 2:0, а салігорская каманда ў сябе дома ўступіла "Іслачы" з Мінскага раёна з вынікам 0:1.
У другім сённяшнім матчы футбалісты "Віцебска" прымуць дзяржынскі "Арсенал" (пачатак у 21.00). Іх паядынак першага круга завяршыўся ўнічыю - 1:1. У мінулы ўікенд віцябчане адолелі ў Мазыры мясцовую "Славію" з лікам 2:1, а іх сённяшнія апаненты перамаглі на сваім полі магілёўскі "Днепр" - 3:1.
Заўтра лідары першынства - футбалісты "Тарпеда-БелАЗа" - згуляюць у Жодзіне з гродзенскім "Нёманам", які займае трэцяе месца ў турнірнай табліцы. У Маладзечне "Іслач" сустрэнецца са "Славіяй", а ў Магілёве "Днепр" будзе сапернічаць са "Слуцкам". Яшчэ два паядынкі пройдуць 18 жніўня: "Смаргонь" - "Мінск", "Гомель" - БАТЭ (Барысаў). Сустрэча "Нафтан" (Наваполацк) - "Дынама" (Мінск) перанесена на больш позні тэрмін.
Становішча ў лідзіруючай групе цяпер такое: "Тарпеда-БелАЗ" - 36 ачкоў (17 матчаў), "Дынама" (Мінск) - 35 (15), "Нёман" - 34 (16). Бамбардзірскую гонку ўзначальвае габонскі нападаючы "Гомеля" Родзі Джуніяр Эфаге, у актыве якога 11 забітых мячоў.-0-
