27 красавіка, Брэст /Кар. БЕЛТА/. У Брэсце з 26 па 29 красавіка праходзіць рэспубліканскі турнір па стральбе з лука "Кубак адкрыцця сезона", паведаміў карэспандэнту БЕЛТА галоўны суддзя спаборніцтваў, трэнер-выкладчык Рэспубліканскага цэнтра алімпійскай падрыхтоўкі па стралковых відах спорту Аляксей Крывачэнка.
У спаборніцтвах удзельнічаюць больш за 90 спартсменаў. У тым ліку прадстаўлена ўся нацыянальная каманда. Гэта першы старт беларускіх лучнікаў на адкрытым паветры, які традыцыйна праходзіць у Брэсце. "Спаборніцтвы з'яўляюцца адборачнымі на асноўны старт сезона - II Гульні краін СНД. Таксама гэта этап адбору на міжнародныя спаборніцтвы, якія пройдуць у Казахстане. Акрамя таго, турнір уваходзіць у сістэму рэйтынгавых стартаў, па выніках якіх вызначаецца склад нацыянальнай каманды", - сказаў Аляксей Крывачэнка.
Першы дзень спаборніцтваў пачаўся з трэніроўкі-прыстрэлкі спартсменаў на брэсцкім лукадроме. Сёння адбудзецца парад адкрыцця і індывідуальная кваліфікацыя ўдзельнікаў. Практыкаванне прадугледжвае два падыходы да рубяжа па 36 выстралаў на дыстанцыі 70 м. У другой палавіне дня запланаваны камандныя і змешаныя спаборніцтвы. Пасля чарговай кваліфікацыі 28 красавіка адбудзецца асабістая барацьба лучнікаў да розыгрышу медалёў. Фінальная стральба пройдзе 29 красавіка.
Пераважная большасць удзельнікаў турніру - спартсмены ва ўзросце да 25 гадоў. Канкурэнцыя за пуцёўку на Гульні краін Садружнасці чакаецца сур'ёзная. "У нацыянальную каманду ўвойдуць шэсць мацнейшых лучнікаў - трое мужчын і тры жанчыны. Каб у яе трапіць, трэба альбо паказаць кваліфікацыйны нарматыў, які ёсць у крытэрыях адбору Гульняў, альбо ўвайсці ў гэту тройку па выніках рэйтынгу ў асабістым заліку на момант фарміравання каманды. У любым выпадку сённяшні старт - першая прыступка для вызначэння мацнейшых спартсменаў", - адзначыў галоўны суддзя спаборніцтваў.
Чакаецца, што склад нацыянальнай каманды лучнікаў на ІІ Гульні краін СНД трэнерскі штаб аб'явіць да рэспубліканскага тэставага турніру, які пройдзе ў чэрвені ў Магілёве.
