6 мая, Мінск /Кар. БЕЛТА/. У Мінску парад 9 мая пачнецца ў 20.30. Аб гэтым расказаў намеснік міністра абароны Аляксандр Навуменка ў час прэс-канферэнцыі, перадае карэспандэнт БЕЛТА.
"Парад 9 мая пройдзе ў складзе паветранага эшалона, пешай і механізаванай калон. Пачатак ваеннага парада - 20.30. У складзе паветранага эшалона пройдуць 39 паветраных суднаў (12 верталётаў і 27 самалётаў). З іх 35 адзінак ад Міністэрства абароны Беларусі і 4 адзінкі авіяцыйнай тэхнікі ад Расійскай Федэрацыі. Расію будзе прадстаўляць авіяцыйная група вышэйшага пілатажу "Рускія віцязі" на самалётах Су-30СМ. У падрыхтоўцы паветранага эшалона задзейнічана 48 суднаў, у тым ліку 9 запасных", - расказаў Аляксандр Навуменка.
Ён таксама адзначыў, што ў складзе пешай калоны прымуць удзел 33 парадныя разлікі. "З іх 30 прадстаўляюць сілавыя структуры і ведамствы Рэспублікі Беларусь, а 3 разлікі - ад нашых гасцей з замежных дзяржаў. Іх будуць прадстаўляць кадэты Ніжагародскага кадэцкага корпуса Прыволжскай федэральнай акругі імя генерала арміі В.П. Маргелава, курсанты Міхайлаўскай ваеннай артылерыйскай акадэміі (Санкт-Пецярбург) і ганаровая варта Народна-вызваленчай арміі Кітая. Акрамя таго, удзел прымуць 5 груп ад Азербайджанскай Рэспублікі, Рэспублікі Казахстан, Кыргызскай Рэспублікі, Рэспублікі Таджыкістан і Рэспублікі Узбекістан. Усяго ў складзе пешай калоны задзейнічаны 4832 чалавекі. Яшчэ 431 прыцягнуты ў якасці запасных", - адзначыў намеснік міністра абароны. Ён таксама звярнуў увагу на тое, што ў складзе механізаванай калоны прымуць удзел 26 парадных разлікаў, у складзе якіх задзейнічана 275 адзінак тэхнікі, яшчэ 60 адзінак запасныя.
Аляксандр Навуменка падкрэсліў, што асаблівасцю парада ў бягучым годзе з'яўляецца павелічэнне яго гістарычнай часткі. "Мы ўбачым кавалерыстаў, тачанку з кулямётам, дабавіліся парадныя разлікі афіцэраў з вінтоўкамі і баявымі сцягамі-рэліквіямі воінскіх часцей, якія прымалі ўдзел у Вялікай Айчыннай вайне. Таксама пройдзе зводны парадны разлік інжынераў з сабакамі, медыцынскіх работнікаў і рэгуліроўшчыкаў. Механізаваную калону ўзначаляць легендарныя танкі Т-34, пройдуць матацыклы, "Кацюша", аўтамабілі з пражэктарам і зенітнымі ўстаноўкамі", - расказаў ён.
Намеснік міністра абароны таксама дадаў, што на сённяшні дзень праведзены дзве трэніроўкі паветранага эшалона над горадам. "З улікам надыходу цемнаты паветраныя судны ажыццяўляюць пралёт з пробліскавымі агнямі, што надае відовішчнасць мерапрыемству. Наступная дата трэніроўкі - 7 мая, два вылеты над месцам правядзення парада. 2 мая праведзена генеральная трэніроўка пешай і механізаванай калон на месцы правядзення парада. Сёння пройдзе заключная трэніроўка, яна будзе максімальна набліжана да ўмоў правядзення парада. Праведзеныя трэніроўкі сведчаць аб тым, што асабовы склад і тэхніка да правядзення ваеннага парада гатовы", - рэзюмаваў Аляксандр Навуменка.-0-
