26 ліпеня, Мінск /Кар. БЕЛТА/. Сельгасарганізацыям Беларусі важна забяспечыць уборку збожжа на дастойным узроўні і без страт. Аб гэтым заявіў журналістам намеснік міністра сельскай гаспадаркі і харчавання Уладзімір Гракун, перадае карэспандэнт БЕЛТА.
"Гаспадаркі ўсіх абласцей Беларусі вядуць актыўную ўборку збожжавых культур. Першым мы пачалі ўбіраць азімы ячмень, цяпер пераключыліся на астатнія культуры. На сённяшнюю раніцу ўбрана 15 працэнтаў плошчаў, а намалочана 1,065 млн т збожжа каласавых культур. Паўмільёна тон гэтага аб'ёму складае азімы ячмень. Паралельна мы вядзём уборку рапсу, ураджайнасць якога нас таксама радуе. На гэты момант ужо ўбрана 57 працэнтаў плошчаў гэтай культуры. Акрамя таго, пачалася ўжо здача харчовага і піваварнага збожжа на элеватар. Упэўнены, што мы цалкам забяспечым харчовую бяспеку - нарыхтуем неабходныя аб'ёмы фуражнага збожжа і збожжа для насеннага матэрыялу", - адзначыў Уладзімір Гракун.
Ён дадаў, што па тэмпах уборкі лідзіруюць сельгасарганізацыі Брэсцкай вобласці, дзе ўраджайнасць збожжа складае больш за 40 ц/га. Пры гэтым максімальнай ураджайнасці - каля 50 ц/га - удалося дасягнуць у Гродзенскай вобласці.
"Вядома, засуха гэтага года паўплывала на ўзровень ураджайнасці. У бягучым годзе яна крыху ніжэйшая за мінулагоднюю, але тым не менш усё яшчэ нядрэнная - у сярэднім 35 ц/га. Аднак на тых палях, дзе прымяняліся тэхналогіі, шкода нанесена мінімальная - там ідзе наліванне зерня і фарміруецца добры ўраджай. Цяпер сельгасарганізацыям важна выкарыстоўваць кожны момант добрага надвор'я, каб забяспечыць уборку збожжа на дастойным узроўні і без страт. Мы павінны прыкласці максімальныя намаганні, дзе неабходна - падсушыць збожжа, але ўвесь ураджай павінен быць у засеках", - заявіў намеснік міністра сельскай гаспадаркі і харчавання.-0-
