20 жніўня, Мінск /Кар. БЕЛТА/. Аб прамежкавых выніках уборкі збожжавых у час прэс-канферэнцыі "Уборачная кампанія - 2024: першыя вынікі і дасягненні аграрыяў" расказаў намеснік міністра сельскай гаспадаркі і харчавання Уладзімір Гракун, перадае карэспандэнт БЕЛТА.
Згодна з ацэнкамі спецыялістаў і вучоных, чаканы намалот збожжавых і зернебабовых культур з улікам кукурузы складзе 9,2 млн т. У гэтым годзе парадаваў і ўраджай рапсу, які перавысіў мінулагодні ўзровень і склаў 1,1 млн т. Усяго ў гэтым годзе мы павінны мець 10,3 млн т, адзначыў Уладзімір Гракун.
Аграрыі выйшлі на завяршальны этап уборкі збожжавых і зернебабовых культур. Ужо ўбрана 96 працэнтаў плошчаў. Практычна ўсе рэгіёны краіны, за выключэннем асобных раёнаў Віцебскай і Магілёўскай абласцей, сабралі ўраджай збожжавых і зернебабовых. Плошчы, што засталіся для ўборкі, засеяны грэчкай і просам, якія, паводле слоў намесніка міністра, у бліжэйшы час будуць зжаты.
Па стане на 20 жніўня ў Беларусі ўжо сабрана збожжа (з улікам рапсу) 7,629 млн т, з іх - 6,555 млн т збожжавых і зернебабовых культур, 1,074 млн т рапсу. "Мы яшчэ павінны ўбраць 30 тыс. т яравога рапсу і чакаем больш як 50 тыс. т намалоту грэчкі і проса, - удакладніў Уладзімір Гракун. - З улікам таго, што малыя фермерскія гаспадаркі павінны нам даць звыш 200 тыс. т намалоту (у 2023 годзе яны ўнеслі ў агульны каравай 277 тыс. т) і каля 80 тыс. т прысядзібныя ўчасткі, згодна з ацэнкамі спецыялістаў і вучоных, чаканы намалот з кукурузай складзе 9,2 млн т. Парадаў у гэтым годзе і рапс: мы сабралі больш, чым у 2023-м, - 1,1 млн т. Усяго мы павінны мець 10,3 млн т збожжа".
Паралельна з уборкай збожжавых прадаўжаецца церабленне лёну. Крыху засталося выцерабіць у Магілёўскай вобласці, астатнія рэгіёны вядуць абарот і падбор лёну. Ідзе сяўба азімага рапсу, іншыя гаспадаркі вядуць падрыхтоўку да сяўбы азімых збожжавых, убіраюць бульбу і іншыя агароднінныя культуры.
"Збіраецца ўраджай ранняй бульбы. Маладая агародніна паступае на паліцы нашых магазінаў, і мы ўжо можам купіць сваю прадукцыю", - дадаў намеснік міністра сельскай гаспадаркі і харчавання.
Уборачная кампанія з'яўляецца важным і заключным этапам усяго комплексу тэхналагічных работ па вырошчванні сельскагаспадарчых культур. Задачы па ўборачнай кампаніі былі пастаўлены яшчэ ў канцы 2023 года, калі ішло планаванне і вызначалася азімая сяўба пад ураджай 2024 года. Была ўстаноўлена задача - атрымаць 11 млн т збожжа з улікам рапсу.-0-
