15 снежня, Камянецкі раён /Кар. БЕЛТА/. У нацыянальным парку "Белавежская пушча" сёння далі старт рэспубліканскай навагодняй дабрачыннай акцыі "Нашы дзеці", перадае карэспандэнт БЕЛТА.
У гэтым годзе акцыя набыла новы фармат. На яе адкрыццё ў Белавежскую пушчу запрашэнні атрымалі 150 дзяцей. Кожная дэлегацыя паўдзельнічала ў квесце і з дапамогай карты адшукала ў маёнтку беларускага Дзеда Мароза канверты з пасланнямі ад кожнай вобласці і горада Мінска. Гаспадар казачнай сядзібы паабяцаў здзейсніць усе мары і жаданні. Менавіта з самага сэрца запаведнага лесу далі старт навагодняй акцыі "Нашы дзеці". З Брэсцкай вобласці марафон дабра адправіўся па Беларусі. У фармаце тэлемоста да цырымоніі далучылася Гродзенская, Гомельская, Магілёўская, Мінская, Віцебская вобласці і Мінск.
"Мы даём старт акцыі разам з усёй краінай. Ва ўсіх кутках нашай рэспублікі таксама ў прамым эфіры знаходзяцца дзеці і дарослыя, якія адпраўляюць у дарогу экспрэс добрых спраў - акцыю "Нашы дзеці". Яна крочыць па краіне больш за 25 гадоў, ініцыяваная нашым Прэзідэнтам. Мы бачым, што рэальна робіцца ў Беларусі для шчаслівага і камфортнага дзяцінства", - падкрэсліў намеснік прэм'ер-міністра Ігар Петрышэнка. Ён адзначыў, што ў краіне вялікую ўвагу ўдзяляюць развіццю адукацыі і магчымасцям для творчасці юных беларусаў.
Напярэдадні Новага года цудаў і падарункаў чакаюць і дарослыя, і дзеці. "Пажылыя людзі таксама маюць патрэбу ў свяце. Мы гэта свята ствараем і для іх. Літаральна праз тыдзень стартуе акцыя "Ад усёй душы", дзе мы павінны ўдзяліць увагу пажылым людзям сваім спагадлівым стаўленнем, творчасцю, шчырымі і добрымі ўчынкамі", - сказаў віцэ-прэм'ер, цёпла павіншаваўшы ўсіх з зімовымі святамі.
Старшыня Брэсцкага аблвыканкама Юрый Шулейка дадаў, што акцыя "Нашы дзеці" не пакіне без увагі ніводнае дзіця. "Мы любім вас. Наша краіна робіць усё, каб вы вучыліся, былі здаровыя", - падкрэсліў кіраўнік Брэсцкай вобласці.
Дзеці, якіх сёння запрасілі на свята ў Белавежскую пушчу, аказаліся ў самай сапраўднай казцы. "Вельмі рада апынуцца тут. Спадзяюся атрымаць шмат уражанняў, пазнаёміцца з юнакамі і дзяўчатамі з майго раёна. Цікава было пабываць зімой у Белавежскай пушчы, у маёнтку Дзеда Мароза. Хацелася б у яго папрасіць дабрабыту і ласункаў", - расказала школьніца Кацярына Міхалькевіч.
Марына Русак да гэтага ні разу не была ў Белавежскай пушчы. Запрашэнне на свята ў дзень старту акцыі "Нашы дзеці" стала для яе вялікім сюрпрызам. "Тут прыгожа, нібы ў казцы. Ніколі не была ў Дзеда Мароза да гэтага, але пісала яму пісьмы. У мяне ёсць просьба да яго, але пра яе прамаўчу - гэта сакрэт. Скажу яму асабіста", - прызналася дзяўчынка.
Навагодняя дабрачынная акцыя "Нашы дзеці" пройдзе з 15 снежня 2023 года па 15 студзеня 2024-га. Яна падорыць магчымасць тысячам юных беларусаў ажыццявіць свае жаданні.-0-
