12 верасня, Мінск /Кар. БЕЛТА/. На грамадскае абмеркаванне вынесены праект указа Прэзідэнта Беларусі "Аб змяненні ўказа Прэзідэнта Рэспублікі Беларусь", якім прадугледжана ўнясенне змяненняў у Правілы дарожнага руху, паведамляе БЕЛТА са спасылкай на Нацыянальны прававы інтэрнэт-партал.
Дакумент падрыхтаваны ў мэтах удасканалення арганізацыі дарожнага руху, зніжэння колькасці дарожна-транспартных здарэнняў і павышэння культуры ўдзельнікаў дарожнага руху.
Праектам указа замацоўваюцца абавязкі веласіпедыстаў і асоб, якія перамяшчаюцца на сродках персанальнай мабільнасці, спешвацца пры перасячэнні праезнай часткі дарогі па пешаходным пераходзе, а таксама ў асобных выпадках пры руху па велапераездзе і веласіпеднай дарожцы. Змяненні абумоўлены ўзросшай колькасцю дарожна-транспартных здарэнняў на пешаходных пераходах з-за ігнаравання вышэйназванымі катэгорыямі патрабаванняў ПДР, што датычацца неабходнасці рухацца са скорасцю пешахода, які ідзе крокам.
Таксама карэкціруецца паняцце сродку персанальнай мабільнасці (электрасамакат, гіраскутар, сігвей і іншае) у частцы ўстанаўлення максімальнай тэхнічна дапушчальнай скорасці такога сродку - 25 км/гадз. Акрамя таго, забаронены рух гэтага сродку ў пешаходных зонах.
Арганізатар грамадскага абмеркавання - Міністэрства ўнутраных спраў. Свае заўвагі і прапановы можна выказаць у спецыяльнай тэме на Прававым форуме Беларусі з 12 па 27 верасня 2024 года.-0-
