18 кастрычніка, Мінск /Кар. БЕЛТА/. На 70 працэнтаў вырасла колькасць шматдзетных сем'яў у Беларусі за апошнія гады. Аб гэтым журналістам паведаміла кансультант упраўлення народанасельніцтва, гендарнай і сямейнай палітыкі Міністэрства працы і сацыяльнай абароны Алена Комлік, перадае карэспандэнт БЕЛТА.
"Паводле даных перапісу насельніцтва 2019 года, у краіне налічвалася 1 млн 143 тыс. сем'яў з дзецьмі ва ўзросце да 18 гадоў. Сярэдні памер сям'і ў Беларусі складае 3,6 чалавека. За міжперапісны перыяд - з 2009 па 2019 год - колькасць двухдзетных сем'яў павялічылася на 12,6 працэнта, цяпер кожная трэцяя сям'я - двухдзетная. Рэкордна пры гэтым павялічылася колькасць шматдзетных сем'яў - практычна на 70 працэнтаў. Гэта тэндэнцыя прадаўжаецца, прычым ва ўсіх рэгіёнах краіны. Колькасць шматдзетных сем'яў на 1 кастрычніка бягучага года склала больш за 123 тыс. Самая вялікая іх колькасць пражывае ў Брэсцкай вобласці (больш за 25 тыс.) і ў Мінскай вобласці (практычна 22 тыс.). Неабходна адзначыць, што большасць шматдзетных сем'яў (80 працэнтаў) - трохдзетныя", - расказала Алена Комлік.
Ёсць у краіне і ўнікальныя сем'і, якія выхоўваюць 10 і больш дзяцей. У лідарах Брэсцкая вобласць, дзе пражываюць 16 такіх сем'яў, у Гродзенскай і Мінскай абласцях пражываюць па сем сем'яў з 10 дзецьмі. Самая вялікая шматдзетная сям'я ў краіне выхоўвае 15 дзяцей і пражывае ў Мінскай вобласці.
Тэзіс "Моцная сям'я - моцная дзяржава" традыцыйна з'яўляецца адной са стратэгічных асноў, якія кансалідуюць беларускае грамадства. Для беларусаў сям'я мае высокую каштоўнасць - 98 працэнтаў насельніцтва лічаць сям'ю важнейшай часткай свайго жыцця. У сем'ях пражывае каля 80 працэнтаў усяго насельніцтва краіны. Даследаванне пацвярджае, што большасць беларусаў сям'ю асацыіруюць з дзецьмі", - дадала прадстаўнік Мінпрацы.-0-
