Нацыянальны банк прэзентаваў новы графічны знак беларускага рубля, перадае карэспандэнт БЕЛТА.
Пераможцам конкурсу на лепшы новы графічны знак стаў Васіль Шчабятун. Яго работа набрала максімальную сумарную колькасць балаў. Аўтару сёння ўручылі прыз - сертыфікат на Br3 тыс.
"20 гадоў таму быў выбраны графічны знак беларускага рубля з дзвюх лацінскіх літар - Br. Бачым, што ён па нейкіх прычынах не прыжыўся, практычна ніхто не выкарыстоўваў яго ў разліках і публікацыях. Таму было прынята рашэнне аб'явіць конкурс. Самыя галоўныя крытэрыі - пазнаваемасць, асацыятыўнасць з беларускім рублём, прастата, каб не было некалькіх літар. З заявак, якія паступілі, адабралі адпаведныя крытэрыям, а потым самыя лепшыя з іх адправілі на ўсеагульнае народнае галасаванне. Аддавалі перавагу тым работам, якія былі найбольш поўна раскрыты аўтарамі. Новы знак атрымаў большасць галасоў", - сказаў намеснік старшыні праўлення Нацыянальнага банка Андрэй Картун.
Распрацаваны план мерапрыемстваў па папулярызацыі новага графічнага знака беларускага рубля. "Спадзяюся, у хуткім часе мы ўбачым яго ў магазінах, у публікацыях", - дадаў Андрэй Картун.
Пераможца конкурсу - дызайнер па прафесіі. Ён прапанаваў на конкурс тры розныя варыянты графічнага знака. "Гэты конкурс стаў для мяне магчымасцю заявіць пра сабе. Дзякуй усім, хто прыняў удзел у галасаванні і прагаласаваў за мяне", - адзначыў Васіль Шчабятун.
Як паведамлялася, амаль 2,7 тыс. заявак паступіла для ўдзелу ў конкурсе на новы графічны знак беларускага рубля. Прыём работ завяршыўся 7 лістапада. Конкурсная камісія вызначыла пяць лепшых работ, якія размясцілі на сайце Нацбанка для галасавання. Усяго ў конкурсе на новы графічны знак беларускага рубля прагаласавалі 22 146 удзельнікаў. Анлайн-галасаванне завяршылася 28 лістапада. Новы графічны знак быў выбраны з улікам вынікаў галасавання і ацэнак камісіі. Вынікі конкурсу былі аб'яўлены 31 снежня 2025 года.
Пастановай праўлення Нацыянальнага банка ад 27 студзеня 2026 года нумар 25 устаноўлены графічны знак афіцыйнай грашовай адзінкі - беларускага рубля. Пастанова ўступае ў сілу пасля яе афіцыйнага апублікавання.-0-
