29 красавіка, Мінск /Кар. БЕЛТА/. НЦІУ вядзе работу з буйнымі расійскімі медыясэрвісамі па пытанні ўзнагароджвання беларускіх аўтараў. Аб гэтым паведаміў намеснік генеральнага дырэктара Нацыянальнага цэнтра інтэлектуальнай уласнасці Аляксандр Заяц у час круглага стала ў прэс-цэнтры БЕЛТА.
"У нас ёсць дагавор аб узаемным прадстаўніцтве з Расійскім аўтарскім таварыствам. Мы прадстаўляем іх інтарэсы на тэрыторыі Беларусі, а яны - нашы інтарэсы на тэрыторыі Расіі. Адзначу, што твораў і аўтараў у нас менш, чым у суседняй краіне, але ўзаемадзеянне ідзе вельмі цесна, - сказаў Аляксандр Заяц. - Цяпер мы актывізуем сваю работу з суб'ектамі Расійскай Федэрацыі, якія працуюць у інтэрнэце. У прыватнасці, з анлайн-кінатэатрамі і стрымінгавымі сэрвісамі".
Паводле слоў намесніка гендырэктара НЦІУ, сфера інтэрнэту не мае меж, таму бывае складана зразумець, дзе адбываецца выкарыстанне твора - у Расійскай Федэрацыі ці ўсё ж такі на тэрыторыі Беларусі.
"Цяпер удзяляем вялікую ўвагу ўстанаўленню ў нармальных цывілізаваных умовах кантактаў і дагаворных адносін з суб'ектамі Расійскай Федэрацыі, якія вяшчаюць з дапамогай інтэрнэту на тэрыторыі нашай краіны. Вырашаем пытанні правамернага выкарыстання. Нашы грамадзяне кожны месяц аплачваюць падпіскі на розныя сэрвісы і таму нам важна, каб беларускія аўтары атрымлівалі ўзнагароду за свае творы. Калі нам усё ж такі ўдасца дамовіцца з буйнымі медыясэрвісамі, то гэта стане для нас вялікім крокам з пункту гледжання развіцця ўсёй сістэмы калектыўнага кіравання", - заявіў Аляксандр Заяц.
Ён дадаў, што з суб'ектамі іншых краін з-за геапалітычнай абстаноўкі ўзаемадзейнічаць складаней. Таму работа вядзецца там, дзе сапраўды ёсць перспектывы.
"Нам важна ўзаемадзеянне з аўтарскай супольнасцю. На рэгулярных сустрэчах з рэкамендацыйна-кансультатыўным саветам мы бачым праблемы, з якімі сутыкаюцца нашы аўтары. Без іх прафесійнага меркавання бывае ў прынцыпе немагчыма вырашыць нейкую сітуацыю. Такім чынам наша сумесная работа дае вялікі вынік", - рэзюмаваў намеснік генеральнага дырэктара НЦІУ.-0-
