1 жніўня, Мінск /Кар. БЕЛТА/. Падатковыя органы пачалі накіроўваць фізічным асобам паведамленні аб выплаце маёмасных падаткаў. Аб гэтым паведаміў у час прэс-канферэнцыі начальнік галоўнага ўпраўлення падаткаабкладання фізічных асоб Міністэрства па падатках і зборах Андрэй Кавалеўскі, перадае карэспандэнт БЕЛТА.
"Штогод фізічныя асобы выплачваюць тры маёмасныя падаткі - транспартны, зямельны і на нерухомую маёмасць - за мінулы каляндарны год. Гэта значыць, у 2024 годзе за 2023-і. Падатковыя органы самастойна атрымліваюць інфармацыю аб аб'ектах падаткаабкладання, аб правах плацельшчыка на розныя падатковыя льготы, робяць разлік падаткаў. Сёння падатковыя органы пачынаюць накіроўваць паведамленні на выплату фізічнымі асобамі маёмасных падаткаў. У адпаведнасці з заканадаўствам гэтыя паведамленні будуць накіроўвацца плацельшчыкам да 1 кастрычніка. Гэта значыць, на працягу бліжэйшых двух месяцаў усе плацельшчыкі атрымаюць паведамленні па пошце. Тыя фізічныя асобы, у якіх ёсць асабісты кабінет плацельшчыка і якія згадзіліся на атрыманне паведамленняў электронным спосабам, дадаткова да папяровай версіі атрымаюць яшчэ электронныя паведамленні", - сказаў Андрэй Кавалеўскі.
Паводле яго слоў, сэрвісы па выплаце адзінага маёмаснага плацяжу ў асабістым кабінеце фізічнай асобы, а таксама ў сістэме АРІП будуць даступны ў бліжэйшыя дні.
"У паведамленні зводзяцца ўсе аб'екты падаткаабкладання маёмаснымі падаткамі, якія належаць плацельшчыку і знаходзяцца на тэрыторыі Беларусі. Гэта можа быць кватэра ў Мінску, дача ў Пухавіцкім раёне, атрыманы ў спадчыну жылы дом у іншым раёне, транспартны сродак. Адно паведамленне змяшчае ў сабе ўсё, што вельмі зручна. Не трэба, як некалькі гадоў таму, атрымліваць некалькі паведамленняў ад розных раённых інспекцый. Плацельшчык адразу ўбачыць усе аб'екты падаткаабкладання, разлік падатку па кожным з іх і агульную суму падатку, што падлягае выплаце", - адзначыў прадстаўнік МПЗ. У паведамленні дадаткова размяшчаецца код хуткага плацяжу для сістэмы АРІП, а таксама QR-коды для выплаты.
У 2024 годзе ўпершыню тры віды маёмасных падаткаў будуць выплачаны адзіным маёмасным плацяжом. "Гэта не новы падатак, гэта агульная сума ўсіх трох падаткаў, якія выплачвае фізічная асоба. Гэта зроблена для зручнасці плацельшчыкаў. Раней, да ўвядзення гэтага механізма, неабходна было выплачваць кожны падатак паасобку. Гэта прыводзіла да цяжкасцей. Трэба было некалькі разоў перайсці па дрэве АРІП, гэта забірала шмат часу. Бывалі і сітуацыі, калі фізічныя асобы выплачвалі падаткі не на той бюджэт (напрыклад, замест Пухавіч на Мінск), гэта прыводзіла да бюджэтных перазалічэнняў. Праведзена значная работа, і цяпер плацеж праходзіць адной сумай", - падкрэсліў начальнік галоўнага ўпраўлення.
Але гэта не значыць, што пасля атрымання паведамлення трэба заплаціць усю суму за раз. "Як і раней, падаткі можна заплаціць часткамі. Наладжана ўзаемадзеянне з АРІП. Калі плацельшчык атрымаў паведамленне, дапусцім, на суму Br100, ён можа адразу заплаціць Br10. Літаральна праз мінуту, зайшоўшы ў АРІП паўторна, ён ужо ўбачыць астатак завінавачанасці. Даныя будуць абнаўляцца не праз дзень-два, а аператыўна, у рэжыме анлайн", - звярнуў увагу Андрэй Кавалеўскі.
У выпадку, калі фізічная асоба страціла паведамленне або не атрымала, але хоча датэрмінова заплаціць падаткі, дастаткова ведаць уліковы нумар плацельшчыка. Па ім можна ўдакладніць суму, якая падлягае выплаце. Уліковы нумар можна знайсці пры дапамозе сэрвісу "Звесткі з дзяржаўнага рэестра плацельшчыкаў" на сайце падатковых органаў Беларусі.
А ў асабістым кабінеце плацельшчыка можна перафарміраваць паведамленне і працаваць з ім у электронным выглядзе. "Дарэчы, асабісты кабінет можна адкрыць дыстанцыйна (з выкарыстаннем міжбанкаўскай сістэмы ідэнтыфікацыі або звестак мабільнага аператара). Ужо няма неабходнасці наведваць падатковы орган, хоць такі спосаб таксама застаўся", - дадаў прадстаўнік МПЗ.
Тэрмін выплаты маёмасных падаткаў - не пазней за 15 лістапада 2024 года. Пасля заканчэння гэтага тэрміну будзе налічана пеня і могуць быць прыменены меры адміністрацыйнай адказнасці. Аднак падатковыя органы ў першую чаргу нацэлены на тое, каб папярэдзіць плацельшчыкаў і не даводзіць да такіх наступстваў. Толькі калі пасля напамінаў чалавек усё роўна не выплачвае падаткі, тады сумы перадаюцца на спагнанне ў органы прымусовага выканання.-0-
