15 красавіка, Мінск /Кар. БЕЛТА/. Аграрыі рэспублікі пасеялі 26,5 працэнта яравых культур на плошчы 612,3 тыс. га, у тым ліку сяўба ранніх яравых збожжавых і зернебабовых культур без уліку кукурузы, грэчкі і проса завершана на плошчы 456,8 тыс. га, што складае 78,8 працэнта ад плана. Аб прамежкавых выніках пасяўной кампаніі - 2025 карэспандэнту БЕЛТА расказалі ў Міністэрстве сельскай гаспадаркі і харчавання.
У Мінскай вобласці сяўба ранніх збожжавых ужо завершана, а ў Брэсцкай і Гродзенскай выйшла на фінішную прамую, дзе палявыя работы па гэтых відах выкананы на 99,2 працэнта і 98 працэнтаў адпаведна. У Віцебскай вобласці пасеяна 53,8 тыс. га (41,8 працэнта да плана), у Гомельскай - 77 тыс. га (87,5 працэнта), у Магілёўскай - 78,3 тыс. га (69,3 працэнта). Нарошчвае тэмпы сяўба цукровых буракоў (37 працэнтаў), яравога рапсу (15,7 працэнта) і лёну-даўгунцу (30,7%).
Глеба пад сяўбу яравых культур падрыхтавана на 891,6 тыс. га, што складае 38,6 працэнта ад плана. Шэраг рэгіёнаў завяршылі другую падкормку культур: гаспадаркі Брэсцкай, Гродзенскай і Мінскай абласцей - азімага рапсу на зерне, работнікі АПК Мінскай вобласці - яшчэ і азімых збожжавых. Прадаўжаюць запасацца гаспадаркі і мінеральнымі ўгнаеннямі. Паводле даных на 15 красавіка, пад яравую сяўбу гэтага года назапашана 885,9 тыс. т дзеючага рэчыва мінеральных угнаенняў, што складае 75,9 працэнта ад плана.
Для захавання неабходнай вільгаці ў глебе аграрыі праводзяць апрацоўку глыбокарыхліцелямі, па рэспубліцы яна выканана на 92,9 працэнта. Вядзецца таксама вапнаванне кіслых глеб (даламітавая мука неабходна для нейтралізацыі залішняй кіслотнасці і падтрымання аптымальнага глебавага асяроддзя), якое выканана на плошчы 65,9 тыс. га, што складае 26,5 працэнта ад плана. Таксама ўносяцца арганічныя ўгнаенні.-0-
