17 чэрвеня, Брэст /Кар. БЕЛТА/. У Брэсце апублікавалі праграму мерапрыемстваў да Дня ўсенароднай памяці ахвяр Вялікай Айчыннай вайны і генацыду беларускага народа. Падрабязнасці карэспандэнту БЕЛТА паведамілі ў Брэсцкім гарвыканкаме.
Мерапрыемствы пачнуцца з 19 чэрвеня. Найбольш насычанымі на падзеі традыцыйна будуць 21 і 22 чэрвеня. Так, у суботу ў Брэст прыбудзе музейная экспазіцыя "Поезд Перамогі". Каля Паўночных варот Брэсцкай крэпасці ва ўрачыстай абстаноўцы адкрыюць помнік пагранічнікам. Днём у горадзе сустрэнуць удзельнікаў беларуска-расійскага праекта "Поезд Памяці". Вечарам рэканструктары маршам пройдуць па вуліцах Брэста, а потым далучацца да рэтрапраграмы "Апошні мірны дзень" на пешаходнай вуліцы Савецкай.
У Брэсце 22 чэрвеня пачнецца ў асаблівай атмасферы. У 02.00 на плошчы Цырыманіялаў у мемарыяльным комплексе "Брэсцкая крэпасць-герой" загучаць першыя мелодыі канцэрта-рэквіема "4 гады доўгага шляху...". Яго ўдзельнікамі стануць Мікалай Растаргуеў і група "Любэ", Максім Дрозд, Зара, Дзяніс Майданаў, Пётр Захараў, Уладзімір Гасцюхін, Аляксандра Гайдук, арт-група "Беларусы" і іншыя артысты.
У 04.00 па традыцыі пачнецца мітынг-рэквіем. Прысутныя ўскладуць кветкі да Вечнага агню і пліт некропаля, ушануюць памяць абаронцаў Айчыны. На світанні на Кобрынскім умацаванні адбудзецца ваенна-гістарычная рэканструкцыя, у час якой пакажуць эпізоды трагічнай і гераічнай абароны Брэсцкай крэпасці.
У парку культуры і адпачынку вечарам выступіць арт-група "Хор Турэцкага" з канцэртам, прысвечаным 80-годдзю Вялікай Перамогі. Прагучаць кампазіцыі пра мір, подзвіг, каханне. Абяцаецца падарунак - выкананне песень на беларускай мове. На пляцоўцы каля гандлёвага цэнтра "Экватар" адбудзецца канцэрт з удзелам Юліі Чычэрынай, групы Motor-Roller, Мікіты Бялько.
У Брэст прыедуць больш за 30 афіцыйных дэлегацый з Расіі і Казахстана. Яны не толькі прымуць удзел у памятных мерапрыемствах, але і абмяркуюць пытанні міжрэгіянальнага супрацоўніцтва.-0-
