29 жніўня, Мінск /Кар. БЕЛТА/. Беларусь плануе нарасціць пастаўкі тэхнікі ў Пскоўскую вобласць. Аб гэтым заявіў намеснік прэм'ер-міністра Ігар Петрышэнка ў час пасяджэння рабочай групы па супрацоўніцтве Беларусі і Пскоўскай вобласці, якое прайшло ў Пскове, паведамляе карэспандэнт БЕЛТА.
"Пскоўская вобласць - наш добры сусед, з якім склаліся даўнія ўстойлівыя сувязі. Мы развіваем нашы кантакты на ўзроўні кіраўніцтва ўрада, іншых дзяржаўных органаў, суб'ектаў гаспадарання. У нас шматграннае ўзаемадзеянне. Мы правялі чарговае пасяджэнне рабочай групы, якая ўжо стала важным інструментам маніторынгу выканання дамоўленасцей, разгляду актуальных пытанняў супрацоўніцтва і прыняцця аператыўных рашэнняў. У ходзе пасяджэння мы абмеркавалі стан і перспектывы развіцця гандлёва-эканамічнага супрацоўніцтва, у тым ліку ў сферах прамысловасці, сельскай гаспадаркі, будаўніцтва. Актуальны і адукацыя, культура, маладзёжная палітыка, турызм", - сказаў Ігар Петрышэнка.
Ён адзначыў, што ў першым паўгоддзі 2024 года забяспечаны рост тавараабароту. "Ідзём у патрэбных параметрах, галоўнае, нам у частцы росту тавараабароту тэмпы не збаўляць. Лічу, што на бліжэйшы час нашай асноўнай задачай павінна стаць актывізацыя сумесных намаганняў для падтрымання гэтай дадатнай дынамікі і далейшага нарошчвання аб'ёмаў тавараабароту, у тым ліку за кошт дыверсіфікацыі ўзаемных паставак прадукцыі і рэалізацыі сумесных кааперацыйных праектаў", - адзначыў віцэ-прэм'ер.
Пскоўская вобласць удзяляе сур'ёзную ўвагу абнаўленню парку пасажырскай, грузавой, камунальнай, дарожнай тэхнікі. "Беларусь валодае дастатковымі рэсурсамі, каб забяспечыць патрэбнасці вашага рэгіёна. Мне прыемна адзначыць, што ў першым паўгоддзі пастаўлена ўжо 96 адзінак грузавой тэхнікі МАЗ, 41 трактар МТЗ, два пасажырскія аўтобусы, пагрузчыкі "АМКАДОР" і іншая тэхніка. Да канца года аб'ёмы паставак павінны павялічыцца", - падкрэсліў Ігар Петрышэнка. Акрамя гэтага, паспяхова рэалізуецца сумесны кааперацыйны праект па вытворчасці спецтэхнікі з гідраўлічным грузападымальным абсталяваннем на шасі МАЗ (размова ідзе аб калабарацыі МАЗ-РУС з АТ "Пад'ёмныя машыны").
"Нам трэба пашыраць супрацоўніцтва ў сферы прамысловай кааперацыі як у частцы ўзаемных паставак імпартазамяшчальнай прадукцыі, так і рэалізацыі новых перспектыўных сумесных праектаў. Беларускі бок гатовы нарошчваць пастаўкі ў рэгіён прадукцыі сельгасмашынабудавання, уключаючы зернесушыльныя комплексы, пасяўныя, глебаапрацоўчыя агрэгаты. Таксама гатовы ўзаемадзейнічаць па выкарыстанні нашага перадавога вопыту і тэхналогій у аграноміі, жывёлагадоўлі, прымяненні беларускага тэхналагічнага абсталявання на жывёлагадоўчых фермах і іншых аб'ектах. Зацікаўлены таксама супрацоўнічаць па пастаўках беларускіх амінакіслот, прэміксаў, кармоў для жывёл і ветэрынарных прэпаратаў", - зрабіў акцэнт віцэ-прэм'ер.
На яго думку, не ў поўнай меры рэалізаваны патэнцыял супрацоўніцтва ў будаўнічай сферы. "Лічу, што для пскоўскіх партнёраў можа ўяўляць інтарэс будаўніцтва сацаб'ектаў - дзіцячых садоў, школ. Прапаную падабраць і рэалізаваць пілотны праект, а лепш некалькі - на выбар кіраўніцтва Пскоўскай вобласці", - дадаў Ігар Петрышэнка. Беларусь таксама зацікаўлена ў нарошчванні паставак у Пскоўскую вобласць ліфтаў.
"Наша супрацоўніцтва не абмяжоўваецца эканомікай і гандлем, пашыраюцца сувязі ў сферы адукацыі, спорту, турызму, культуры", - рэзюмаваў віцэ-прэм'ер.-0-
