6 снежня, Брэст /Кар. БЕЛТА/. На пляцоўцы будаўніцтва Рэспубліканскага цэнтра патрыятычнага выхавання моладзі ў Брэсцкай крэпасці сёння адбудзецца ўрачыстая цырымонія ўручэння працоўных пуцёвак і маштабная валанцёрская акцыя, паведамляе карэспандэнт БЕЛТА.
Для работы на Усебеларускай маладзёжнай будоўлі пуцёўкі будуць уручаны двум студэнцкім будаўнічым атрадам - Брэсцкага дзяржаўнага ўніверсітэта імя А.С. Пушкіна "Стаханаўцы" і Беларускага дзяржаўнага ўніверсітэта "Аэліта". У складзе кожнага атрада - па 15 чалавек.
"Толькі нядаўна тут завяршыў работу першы студэнцкі атрад "Спадчына" Брэсцкага дзяржаўнага тэхнічнага ўніверсітэта. Моладзь вельмі дастойна сябе праявіла. Даволі сур'ёзная праграма (як у плане будаўнічых работ, так і па грамадзянска-патрыятычным выхаванні) чакае і ўдзельнікаў двух новых студатрадаў. Яны будуць тут задзейнічаны да канца года", - адзначыў другі сакратар ЦК БРСМ Аляксандр Прохараў.
Першапраходцы новай Усебеларускай маладзёжнай будоўлі з атрада БрДТУ "Спадчына" працавалі ў будынку былой казармы, якой у перспектыве трэба стаць інтэрнатам. "Мы адпрацавалі тры тыдні. Па жаданні выходзілі таксама па суботах. Сабралі і вынеслі больш за 100 т смецця, дэманціравалі ўсе дашчатыя падлогі, аконныя рамы, здымалі ўцяпляльнік на паддашку, дапамагалі будаўнікам дэманціраваць пліты перакрыцця. Папрацавалі добра, і заплацілі добра. "Брэстжылбуд" нашу работу высока ацанілі, засталіся намі задаволены", - падзяліўся камандзір атрада Сямён Люльковіч.
Мерапрыемства на Кобрынскім умацаванні Брэсцкай крэпасці пройдзе ў рамках рэспубліканскага семінара Беларускага рэспубліканскага саюза моладзі. На будаўніцтва цэнтра выхавання маладых патрыётаў БРСМ перадасць чарговы сертыфікат на Br50 тыс. Таксама адбудзецца маштабная валанцёрская акцыя. У рамках міжнароднага гісторыка-патрыятычнага праекта "Лічбавая зорка" будзе ўстаноўлена стылізаваная таблічка з QR-кодам.
"У нас вялікія і амбіцыйныя планы сумесна з наймальнікамі і падрадчыкамі на 2024 год па рабоце на Усебеларускай маладзёжнай будоўлі менавіта студэнцкіх атрадаў. Больш таго, мы бачым вялікую цікавасць з боку жыхароў нашых гарадоў, раённых цэнтраў, прадпрыемстваў, арганізацый. Вельмі шмат званкоў паступае на гарачую лінію, якая адкрылася ў Рэспубліканскім доме моладзі, дзеці прыязджаюць у выхадныя дні і аказваюць будаўнікам добраахвотніцкую валанцёрскую дапамогу. мы разам працуем і будуем рэспубліканскі патрыятычны цэнтр для будучыні нашай краіны", - сказаў на заканчэнне другі сакратар ЦК БРСМ.-0-
