12 снежня, Масква /Эдуард Півавар - БЕЛТА/. Расія ратыфікавала пратакол паміж Беларуссю і Расіяй аб унясенні змяненняў у беларуска-расійскае пагадненне аб сумесным забеспячэнні рэгіянальнай бяспекі ў ваеннай сферы ад 19 снежня 1997 года. Дакумент апублікаваны 12 снежня на расійскім прававым інтэрнэт-партале, паведамляе БЕЛТА.
Гэты пратакол быў падпісаны ў Мінску 3 снежня 2022 года. Беларускі бок завяршыў неабходныя ратыфікацыйныя працэдуры па дакуменце ў канцы чэрвеня бягучага года. Дзярждума Расіі ратыфікавала пратакол 5 снежня, Савет Федэрацыі - 7 снежня. 12 снежня закон аб ратыфікацыі пратакола падпісаў Прэзідэнт Расіі Уладзімір Пуцін.
Пагадненне накіравана на прыняцце практычных мер па аб'яднанні намаганняў у галіне фарміравання агульнай прасторы абароны і бяспекі Беларусі і Расіі. Змяненнямі, прадугледжанымі пратаколам, актуалізуецца змест прэамбулы, удакладняецца тэрміналогія. Таксама ўводзіцца паняцце "функцыянаванне рэгіянальнай групоўкі".
Акрамя таго, пратаколам рэгулююцца пытанні рэалізацыі палажэнняў нарматыўных прававых дакументаў двухбаковага супрацоўніцтва ў рамках забеспячэння ваеннай бяспекі Саюзнай дзяржавы, а таксама парадак сумеснага планавання, прымянення рэгіянальнай групоўкі войскаў (сіл), фінансавання сумесных мерапрыемстваў аператыўнай, мабілізацыйнай і баявой падрыхтоўкі.-0-
