31 сакавіка, Мінск /Кар. БЕЛТА/. Абсалютная большасць беларусаў задаволены вынікамі прэзідэнцкіх выбараў. Такія даныя сацыялагічнага даследавання карэспандэнту БЕЛТА агучыла загадчыца кафедры эканамічнай сацыялогіі і псіхалогіі прадпрымальніцкай дзейнасці, кіраўнік Цэнтра сацыяльна-гуманітарных даследаванняў БДЭУ Ірына Лашук.
У лютым 2025 года Цэнтрам сацыяльна-гуманітарных даследаванняў БДЭУ праведзена сацыялагічнае апытанне "Постэлектаральныя настроі грамадства" ў форме інтэрв'ю грамадзян па месцы іх пражывання (па методыцы "твар у твар"). У ім прынялі ўдзел 1,5 тыс. паўналетніх беларусаў з розных рэгіёнаў краіны.
Па выніках аналізу даных апытання, адзначаецца пазітыўны ўзровень ўспрымання большасцю насельніцтва вынікаў праведзеных 26 студзеня 2025 года выбараў Прэзідэнта Рэспублікі Беларусь. Вынікамі задаволены 90,4 працэнта апытаных. Не змаглі адказаць - 8,2 працэнта, не задаволены - 1,4 працэнта.
"Зразумела, што вынікі выбараў мы ўжо ведаем. Але сацыялагічнае суправаджэнне заключаецца ў тым, каб даведацца, што людзі думаюць пасля таго, як выбары адбыліся, - адзначыла Ірына Лашук. - 90,4 працэнта апытаных задаволены вынікамі прэзідэнцкіх выбараў. Гэта вельмі добры працэнт, які блізкі да вынікаў выбараў. Гэта сведчыць, па-першае, аб аб'ектыўнасці вынікаў. Па-другое, што беларусы сапраўды дэманструюць адзінства пазіцый. Яны выбралі таго, каго хацелі".
Не задаволены вынікамі 1,4 працэнта. "Гэта лічба настолькі невялікая. У сацыялогіі гэта лічыцца статыстычна нязначнай велічынёй. Яе можна наогул выключыць з аналізу. Не змаглі адказаць 8,2 працэнта - таксама нязначная лічба, - растлумачыла Ірына Лашук. - Гэта значыць пераважная большасць беларусаў задаволены вынікамі прэзідэнцкіх выбараў".-0-
