Сфарміраваны склад Маладзёжнага савета (парламента) трэцяга склікання пры Нацыянальным сходзе Рэспублікі Беларусь, перадае карэспандэнт БЕЛТА.
Першае пасяджэнне Маладзёжнага савета (парламента) трэцяга склікання пры Нацыянальным сходзе Рэспублікі Беларусь прайшло сёння ў Мінску з удзелам старшыні Савета Рэспублікі Наталлі Качанавай.
Старшынёй Маладзёжнага савета выбрана Аліна Рацькова.
"Будзем прадаўжаць праекты па духоўна-маральным выхаванні моладзі, захаванні гістарычнай памяці, умацаванні традыцыйных сямейных каштоўнасцей і інстытута маладой сям'і ў маладзёжным асяроддзі. Акрамя таго, мы ўжо выйшлі ў электаральную кампанію і лічым вельмі важным і неабходным членам маладзёжнага парламента ўжо з заўтрашняга дня актыўна ўключацца ў прававую, электаральную асвету моладзі, - расказала Аліна Рацькова. - Самае галоўнае, што хочацца зрабіць у рабоце трэцяга склікання, - гэта захаваць усё тое, што ўжо зрабілі нашы калегі на працягу першага і другога скліканняў. У першую чаргу гэта захаванне пераемнасці: ініцыятыў, кантактаў і сувязей па напрамках міжнароднага супрацоўніцтва".
У склад Маладзёжнага савета (парламента) трэцяга склікання пры Нацыянальным сходзе Рэспублікі Беларусь ад абласцей і горада Мінска ўвайшлі 138 маладых людзей ва ўзросце ад 18 да 31 года. Гендарны склад Маладзёжнага парламента прадстаўлены наступным чынам: у трэцім скліканні будуць працаваць 46 мужчын і 92 жанчыны. Ва ўзроставай структуры дамінуюць прадстаўнікі ва ўзросце ад 26 да 31 года - 64 чалавекі, ад 22 да 25 гадоў - 61 чалавек, ад 18 да 21 года - 13 чалавек. Сярэдні ўзрост членаў Маладзёжнага парламента - 25 гадоў. Большая частка членаў Маладзёжнага парламента ўваходзіць у катэгорыю працуючай моладзі (133 чалавекі). У склад уваходзяць чатыры студэнты ўстаноў вышэйшай адукацыі і адзін магістрант установы вышэйшай адукацыі.
З ліку працуючых членаў Маладзёжнага парламента пераважаюць прадстаўнікі сферы адукацыі і прамысловасці. У склад таксама ўваходзяць прадстаўнікі аховы здароўя, дзяржаўнага кіравання, грамадскіх арганізацый, культуры, сувязі і СМІ, сельскай гаспадаркі, аграпрамысловага комплексу, праваахоўных органаў, жыллёва-камунальнай гаспадаркі, сацыяльнага забеспячэння, банкаўскіх устаноў, навукі, турызму.
Са 138 членаў Маладзёжнага парламента 115 чалавек маюць вышэйшую адукацыю, 19 чалавек - сярэднюю спецыяльную. У сфарміраваным скліканні працуюць 6 дэпутатаў мясцовых Саветаў дэпутатаў і 5 дэлегатаў Усебеларускага народнага сходу.
За перыяд работы члены Маладзёжнага савета (парламента) другога склікання пры Нацыянальным сходзе Рэспублікі Беларусь прынялі ўдзел у больш як 300 асабістых прыёмах грамадзян і 200 прамых тэлефонных лініях членаў Савета Рэспублікі і дэпутатаў Палаты прадстаўнікоў, дэпутатаў гарадскіх, абласных і раённых Саветаў дэпутатаў і прадстаўнікоў грамадскіх арганізацый і аб'яднанняў. Члены Маладзёжнага савета (парламента) прымалі ўдзел у пасяджэннях Савета Рэспублікі, сумесных пасяджэннях Савета Рэспублікі і Палаты прадстаўнікоў, пасяджэннях гарадскіх, абласных і раённых Саветаў дэпутатаў.
Па стане на 1 жніўня 2024 года члены Маладзёжнага савета (парламента) арганізавалі работу больш як 1,8 тыс. мерапрыемстваў, а таксама прынялі ўдзел у больш як 3 тыс. мерапрыемстваў.
Са 138 членаў Маладзёжнага савета (парламента) пры Нацыянальным сходзе Рэспублікі Беларусь 84 чалавекі ўваходзілі ў склад рэгіянальных, абласных, гарадскіх органаў беларускага маладзёжнага парламентарызму.-0-
