Сярод рэгіёнаў Расіі Ленінградская вобласць уваходзіць у топ-7 па тавараабароце з Беларуссю. Аб гэтым заявіў намеснік прэм'ер-міністра Юрый Шулейка на сустрэчы з намеснікам старшыні ўрада Ленінградскай вобласці Алегам Малашчанкам, перадае карэспандэнт БЕЛТА.
Паводле слоў Юрыя Шулейкі, узаемадзеянне Ленінградскай вобласці з Беларуссю шматграннае, а частата рабочых кантактаў сведчыць аб высокім, максімальна нацэленым на дасягненне практычных вынікаў інтарэсе да развіцця супрацоўніцтва з нашай краінай.
"Мы вельмі цэнім такі падыход, і са свайго боку зробім усё магчымае, каб дамоўленасці былі ўзаемавыгаднымі, накіраванымі на вырашэнне не толькі бягучых, але і перспектыўных задач развіцця нашага стратэгічнага партнёрства. Сёння рэгіён займае 7-е месца па аб'ёме тавараабароту з Рэспублікай Беларусь сярод суб'ектаў Расійскай Федэрацыі", - расказаў віцэ-прэм'ер.
У 2024 годзе ўзаемны тавараабарот упершыню за многія гады перасягнуў $1 млрд. На думку Юрыя Шулейкі, гэта вельмі пераканаўчыя вынікі эфектыўнага супрацоўніцтва. "Мы пастаянна працуем над пошукам новых значных праектаў, эфектыўна выбудавана работа органаў улады і бізнесу", - адзначыў ён.
Віцэ-прэм'ер выказаў надзею, што вынікі візіту дэлегацыі закладуць аснову фарміравання новай праграмы супрацоўніцтва на перыяд 2026-2027 гадоў, якая будзе зацверджана на чарговым пасяджэнні сумеснай камісіі па развіцці супрацоўніцтва Беларусі і Ленінградскай вобласці РФ.
Акрамя таго, Юрый Шулейка запрасіў удзельнікаў сустрэчы наведаць сельскагаспадарчую выстаўку "Белагра", якая пройдзе ў чэрвені на тэрыторыі індустрыяльнага парка "Вялікі камень". Віцэ-прэм'ер таксама лічыць, што Ленінградская вобласць будзе дастойна прадстаўлена на выязной выстаўцы "ІНАПРАМ" у Мінску, якая адбудзецца ўжо гэтай восенню.-0-
