4 снежня, Брэст /Кар. БЕЛТА/. Абласная выстава сучасных мастакоў-канцэптуалістаў "P.S. Памежны стан" адкрылася ў выставачнай зале Брэсцкага абласнога грамадска-культурнага цэнтра, паведамляе карэспандэнт БЕЛТА.
Другая назва выставы - "Пастскрыптум" - па-свойму таксама канцэптуальная: яе аўтары тым самым нібыта дапаўняюць і адначасова падводзяць рысу ў адыходзячым выставачным годзе. "Гэта выстава - як апошні акорд у 2023 годзе. Ён быў даволі насычаны: адбылося шмат цікавых праектаў, выстаў, з іх тры - рэспубліканскія. Спадзяёмся, што і гэта выстава будзе мець поспех", - сказала загадчыца выставачнай залы Кацярына Шаўчэнка.
У экспазіцыі прадстаўлена больш за 70 работ, у тым ліку жывапіс, графіка, скульптура, фатаграфія, інсталяцыя, арт-аб'екты. Іх аўтары - восем мастакоў з Брэста, Баранавіч і Кобрына, якія працуюць у розных жанрах, тэхніках і напрамках. У выніку выстава атрымалася не толькі разнапланавай і філасофскай, але і стыльнай, з густам сфарміраванай, што прыцягнула на вернісаж шмат публікі.
Як адзначаюць удзельнікі, памежны стан - гэта не толькі псіхалагічны тэрмін. У большай ступені гэты стан чалавека - яго настрой, эмоцыі, разважанні ў пэўны перыяд часу. Кожны мастак выставіў тут работу, прысвечаную гэтай тэме. Сярод удзельнікаў як вопытныя майстры, чые імёны добра вядомыя, так і маладыя мастакі.
Выстава сучаснага выяўленчага мастацтва "P.S. Памежны стан" будзе працаваць да 24 снежня.-0-
