21 верасня, Мінск /Кар. БЕЛТА/. Прэзідэнт Беларусі Аляксандр Лукашэнка 21 верасня сабраў нараду па пытаннях удасканалення адукацыйнай сферы, перадае карэспандэнт БЕЛТА.
На нараду да кіраўніка дзяржавы запрасілі больш за паўсотню чалавек. Гэта не толькі вышэйшыя службовыя асобы краіны і кіраўнікі рэспубліканскіх органаў дзяржкіравання, але і губернатары, кіраўнікі ўстаноў вышэйшай адукацыі і падпарадкаваных Міністэрству адукацыі арганізацый, старшыні профільных камісій Палаты прадстаўнікоў і Савета рэспублікі, кіраўнікі галоўных упраўленняў па адукацыі аблвыканкамаў і камітэта па адукацыі Мінскага гарвыканкама, начальнікі раённых аддзелаў адукацыі і работнікі ўстаноў адукацыі з розных рэгіёнаў краіны.
"Мы сёння зноў вяртаемся да пытанняў адукацыі. Хацелася б, каб у такім пашыраным складзе гэта быў крайні выпадак. Тэма апошнім часам пастаянна гучыць з тэлеэкранаў, не сыходзіць з першых палос прэсы. Сапраўды, чаму і як вучыць хвалюе, як аказалася, не толькі мяне, але і ўсё грамадства. Гэта добра. Мы дамовіліся ў час даклада міністра адукацыі аб гатоўнасці да новага навучальнага года, што сустрэнемся ў верасні і правядзём своеасаблівую работу над памылкамі", - адзначыў Аляксандр Лукашэнка.
Як паведамлялася, 18 жніўня Аляксандр Лукашэнка правёў нараду аб гатоўнасці сістэмы адукацыі да новага навучальнага года. Прычым прадугледжаны першапачаткова традыцыйны даклад міністра і профільнага віцэ-прэм'ера кіраўніку дзяржавы вырас да нарады. На мерапрыемства таксама запрасілі кіраўнікоў Генеральнай пракуратуры і Камітэта дзяржаўнага кантролю, каб пачуць іх ацэнкі аб стане сферы адукацыі. Нарада прайшла ў вельмі крытычным ключы. Аляксандр Лукашэнка фактычна не прыняў справаздачы ні міністра, ні віцэ-прэм'ера.
"Вельмі ўсё добра было на паперы, а ў жыцці аказалася куды больш празаічна: негатовыя да прыёму дзяцей школы, нявырашаныя пытанні з арганізацыяй падвозу дзяцей, харчавання і іншыя не менш сур'ёзныя праблемы. Тады было пытанняў вельмі шмат. Спадзяюся, што сёння пачую не статыстычныя даныя, а канкрэтную інфармацыю аб прынятых урадам мерах па вырашэнні абазначаных пытанняў і прапановы па далейшай рабоце ў гэтым напрамку", - падкрэсліў Прэзідэнт.-0-
