12 мая, Мінск /Кар. БЕЛТА/. В'етнам мае намер вывесці адносіны з Беларуссю на новы, больш высокі ўзровень. Аб гэтым Генеральны сакратар Цэнтральнага камітэта Камуністычнай партыі В'етнама То Лам заявіў 11 мая на сустрэчы з прадстаўнікамі таварыства дружбы "Беларусь - В'етнам", якая адбылася ў Беларускім дзяржаўным музеі гісторыі Вялікай Айчыннай вайны, перадае карэспандэнт БЕЛТА.
У першую чаргу То Лам павіншаваў усіх прысутных і беларускі народ з важным святам - Днём Перамогі. Ён таксама адзначыў поспехі Беларусі ў развіцці краіны і падкрэсліў канструктыўны характар двухбаковага ўзаемадзеяння. Паводле яго слоў, адносіны Беларусі і В'етнама ў апошнія дзесяцігоддзі стабільна ўмацоўваюцца і добра развіваюцца.
"Нягледзячы на розныя цяжкасці, дружба нашых народаў умацоўваецца. Гэта з'яўляецца каштоўным здабыткам для нас. Мы паслядоўна надаём вялікае значэнне традыцыйна дружалюбным адносінам з Беларуссю, хочам з вамі супрацоўнічаць ва ўсіх сферах на карысць двух народаў і ў імя міру, працвітання і стабільнасці ў рэгіёне і ў свеце", - заявіў То Лам.
Генеральны сакратар ЦК Кампартыі В'етнама адзначыў, што ў час свайго афіцыйнага візіту ў Мінск мае намер правесці перагаворы з Прэзідэнтам Беларусі Аляксандрам Лукашэнкам, а таксама іншыя сустрэчы. "Мы будзем абмяркоўваць розныя напрамкі супрацоўніцтва і будзем узнімаць нашы адносіны на новы ўзровень", - сказаў ён.
Асаблівую ролю ва ўмацаванні і актывізацыі ўзаемасувязей паміж краінамі адыгрываюць, на яго думку, грамадскія арганізацыі, народная дыпламатыя. Менавіта таму адным з першых мерапрыемстваў візіту, які адбыўся літаральна праз некалькі гадзін пасля прылёту ў Мінск, стала сустрэча з прадстаўнікамі таварыства дружбы "Беларусь - В'етнам". На яе былі запрошаны ў тым ліку ветэраны - ваенныя спецыялісты, што працавалі ў В'етнаме ў той час, калі Савецкі Саюз аказваў дапамогу гэтай краіне. "Я вельмі рады сустрэчы з беларускімі спецыялістамі, якія звязаны з намі душой. Самыя цёплыя прывітанні і пажаданні вам і беларускаму народу, - сказаў То Лам. - Кампартыя, дзяржава і народ В'етнама заўсёды памятаюць тую добрасардэчную дапамогу, якую аказвалі Савецкі Саюз, савецкі народ, у тым ліку беларускі народ, калі мы змагаліся за сваю свабоду, і аказвае (беларускі народ. - Заўвага БЕЛТА) цяпер, калі мы развіваем сваю краіну". Ён прапанаваў больш актыўна задзейнічаць у мерапрыемствах па лініі таварыства дружбы "Беларусь - В'етнам" розныя сацыяльныя групы, прадстаўнікоў ВНУ і асабліва моладзь, ад якой шмат у чым залежыць будучыня двухбаковых сувязей.
У сваю чаргу старшыня Беларускага таварыства дружбы і культурнай сувязі з замежнымі краінамі Ніна Іванова падзякавала Ген сакратару ЦК Кампартыі В'етнама за тое, што захоўваецца традыцыя сустрэч вышэйшага кіраўніцтва В'етнама з прадстаўнікамі народнай дыпламатыі, ветэранамі і моладдзю. "Вось ужо шэсць дзясяткаў гадоў таварыства "Беларусь-В'етнам" з'яўляецца важным паўнамоцным прадстаўніком у Беларусі, - вобразна выказалася яна пра ролю арганізацыі. - Прычым працуе яно не толькі ў сферы культуры, але мы з гонарам і радасцю расказваем аб эканамічных і сацыяльных дасягненнях В'етнама. Таму ў вас у Беларусі дзве дыпламатычныя місіі".
Карыстаючыся выпадкам, яна павіншавала Генеральнага сакратара ЦК Кампартыі В'етнама з высокай дзяржаўнай узнагародай - па рашэнні Прэзідэнта Беларусі То Лам удастоены ордэна Дружбы народаў. Ніна Іванова падкрэсліла, што з гонарам носіць высокую дзяржаўную ўзнагароду В'етнама - ордэн Дружбы.
Як паведамлялася, То Лам знаходзіцца ў Беларусі з афіцыйным візітам. На 12 мая запланаваны яго перагаворы з Прэзідэнтам Беларусі Аляксандрам Лукашэнкам, яны пройдуць у Палацы Незалежнасці. Бакі абмяркуюць развіццё стратэгічнага супрацоўніцтва Беларусі і В'етнама па ключавых напрамках у эканоміцы, палітыцы і гуманітарнай сферы.
Размова ў першую чаргу пойдзе аб напаўненні канкрэтнымі праектамі распрацоўваемай дарожнай карты па развіцці супрацоўніцтва паміж Беларуссю і В'етнамам. На парадку дня - перспектывы далейшай сумеснай работы па шырокім спектры напрамкаў.
Пасля перагавораў лідараў запланавана падпісанне шэрага дакументаў, якія прызначаны замацаваць стратэгічны характар двухбаковага супрацоўніцтва.
Праграма афіцыйнага візіту То Лама, акрамя перагавораў у Палацы Незалежнасці, прадугледжвае мерапрыемствы па лініі Нацыянальнага сходу і ўрада, азнаямленне з айчынным прамысловым патэнцыялам.-0-
