17 студзеня, Мінск /Кар. БЕЛТА/. Цэнтр грамадскага назірання за выбарамі пачне работу 21 студзеня. Аб гэтым БЕЛТА паведамілі ў прэс-службе Федэрацыі прафсаюзаў Беларусі.
Прадстаўнікі буйнейшых грамадскіх аб'яднанняў, палітычных партый краіны зноў аб'ядноўваюць намаганні для сумеснай работы па назіранні за ходам галасавання. Пачынаючы з першага дня датэрміновага галасавання пачне работу Цэнтр грамадскага назірання за выбарамі, дзе будзе акумулявацца інфармацыя ад наглядальнікаў аб ходзе галасавання і магчымых пазаштатных сітуацыях.
Грамадскімі аб'яднаннямі, палітычнымі партыямі ўжо вылучана амаль 30 тыс. наглядальнікаў. Яны акрэдытаваны практычна на ўсіх участках у кожным рэгіёне Беларусі. Дарэчы, працэс акрэдытацыі нацыянальных наглядальнікаў прадоўжыцца да 20 студзеня.
"Работа цэнтра выбудавана такім чынам, каб на кожным участку працаваў наш нацыянальны наглядальнік. Гэта чалавек з неабходным узроўнем падрыхтоўкі, які добра разумее свае абавязкі і тую адказнасць, якая на яго ўскладзена. Нацыянальныя наглядальнікі ведаюць усе асноўныя заканадаўчыя аспекты арганізацыі работы камісій, парадак галасавання і назірання. Аб ходзе галасавання, магчымых праблемных пытаннях наглядальнікі будуць аператыўна інфармаваць цэнтр. Такая форма работы дае магчымасць не толькі мець аб'ектыўную інфармацыю з участкаў, але і выключае магчымасць скажэння даных", - расказалі ў прэс-службе Федэрацыі прафсаюзаў.
У сваю чаргу ў аператыўным рэжыме цэнтр будзе інфармаваць СМІ і грамадскасць аб усім, што адбываецца на ўчастках.
Таксама з першага дня датэрміновага галасавання для выбаршчыкаў у цэнтры будзе арганізавана работа тэлефоннай гарачай лініі. Кожны жадаючы можа задаць сваё пытанне аб ходзе электаральнай кампаніі, парадку галасавання, паведаміць аб спрэчнай сітуацыі на ўчастку, унесці прапановы па нумары +375 (17) 371-07-76. Час работы гарачай лініі: у перыяд датэрміновага галасавання (аўторак - субота) з 12.00 да 19.00, у асноўны дзень галасавання (нядзеля) - з 8.00 да 20.00. Кожны зварот будзе дэталёва адпрацаваны.-0-
