24 сакавіка, Мінск /Кар. БЕЛТА/. Тыдзень нулявога траўматызму стартаваў ва ўстановах аховы здароўя. Аб гэтым БЕЛТА паведамілі ў Беларускім прафесійным саюзе работнікаў аховы здароўя.
Тыдзень нулявога траўматызму з тэмай "Асабістая асцярожнасць: а можа, проста паспрабуем?" прадоўжыцца да 30 сакавіка ва ўсіх галіновых установах.
Як расказала галоўны тэхнічны інспектар працы Людміла Марозава, мерапрыемства ўжо не першы раз становіцца тэматычным. У мінулым годзе ўсе тыдні нулявога траўматызму, якія праводзіліся штоквартальна, мелі пэўныя тэмы. "Тэматыка мерапрыемстваў вызначалася невыпадкова, і ў асноўным зыходзіла з найбольш часта выяўляемых у выніку маніторынгаў парушэнняў патрабаванняў аховы працы, - растлумачыла Людміла Марозава. - З надыходам вясны арганізацыі актыўна добраўпарадкуюць тэрыторыі, наводзяць парадак, мыюць вокны і праводзяць суботнікі. Таму менавіта ў гэты перыяд, улічваючы рызыку няшчасных выпадкаў, неабходна забяспечыць належны кантроль за бяспечным выкананнем гэтых работ, прымяненнем сродкаў індывідуальнай аховы і станам здароўя работнікаў".
У гэтых мэтах, паводле яе слоў, на працягу тыдня арганізацыі правядуць аператыўныя маніторынгі. У першую чаргу пярвічкі ўдзеляць асаблівую ўвагу недапушчэнню работнікаў да абсталявання з няспраўнасцямі або пры адсутнасці яго выпрабаванняў, аглядаў і тэхнічных аглядаў, а таксама фарміраванню ў калектывах адказнага стаўлення кожнага работніка да асабістай бяспекі і здароўя.
Акрамя таго, у арганізацыях пракантралююць своечасовае правядзенне інструктажаў па ахове працы і навучанне работнікаў бяспечным прыёмам і метадам выканання работ па добраўпарадкаванні тэрыторый на суботніках і іншых работ, не звязаных з непасрэднымі абавязкамі па прафесіі рабочага або пасадзе служачага.-0-
