9 ліпеня, Мінск /Кар. БЕЛТА/. У Беларусі плануюць асвоіць выпуск яшчэ некалькіх сучасных форм прэпаратаў для лячэння трамбозу і прадухілення ўтварэння тромбаў. Аб гэтым заявіў намеснік генеральнага дырэктара РУП "Белмедпрэпараты" па інавацыйным развіцці Сяргей Марчанка ў YouTube-праекце БЕЛТА "Па факце: рашэнні Першага".
Паводле яго слоў, прадпрыемства прадаўжае распрацоўку прэпаратаў з нізкамалекулярнымі гепарынамі. Ужо наладжаны выпуск такога гепарыну ў флаконах, а з нядаўняга часу - і ў папярэдне запоўненых лекавым сродкам шпрыцах.
"Зарэгістраваны і на працягу некалькіх гадоў прадаецца лекавы прэпарат "Энаксапарын". Гэта нізкамалекулярны аналаг гепарыну, антытрамбатычны лекавы прэпарат", - растлумачыў спецыяліст. Выкарыстоўваюць гэты сродак для лячэння ўжо існуючых тромбаў і для прадухілення ўтварэння тромбаў да і пасля аперацый, пры захворваннях са значна абмежаванай рухомасцю, пры нестабільнай стэнакардыі, пасля інфаркту міякарда і гэтак далей.
"У распрацоўцы яшчэ дзве формы нізкамалекулярных гепарынаў, якія таксама ў хуткім часе будуць выведзены на рынак", - расказаў Сяргей Марчанка. Ён звярнуў увагу, што такая біятэхналагічная прадукцыя патрабуе вялікага комплексу выпрабаванняў па доказе біяпадабенства малекулы і фармакалагічнага дзеяння, якое аказвае прэпарат.
"Таму распрацоўка не такая хуткая, як нехта можа падумаць. Праводзіцца вялікі шэраг даследаванняў "in vitro" і "in vivo" (у штучным асяроддзі, у прабірцы і ўнутры жывых арганізмаў. - Заўвага БЕЛТА), даклінічныя выпрабаванні, фізіка-хімічныя даследаванні па доказе падабенства структур такіх біятэхналагічных прэпаратаў.-0-
