16 мая, Мінск /Кар. БЕЛТА/. У Беларусі выпрацуюць рэкамендацыі па правядзенні адзінай дзяржаўнай палітыкі ў сферы гістарычнай памяці. Аб гэтым заявіў кіраўнік Адміністрацыі Прэзідэнта Беларусі Ігар Сергяенка на пасяджэнні Рэспубліканскага савета па гістарычнай палітыцы, перадае карэспандэнт БЕЛТА.
Ігар Сергяенка расказаў, што пасля Паслання Прэзідэнта беларускаму народу і парламенту складзены пратакол даручэнняў кіраўніка дзяржавы. Адно з іх датычыцца работы савета. "На рэалізацыю гэтага даручэння павінна быць накіравана работа нашага савета ў гэтым годзе: "Рэспубліканскаму савету па гістарычнай палітыцы пры Адміністрацыі Прэзідэнта Рэспублікі Беларусь выпрацаваць рэкамендацыі па правядзенні адзінай дзяржаўнай палітыкі ў сферы гістарычнай памяці і арганізацыі работы па ўмацаванні нацыянальнай самасвядомасці, заснаваныя на навуковых падыходах і прынцыпах гісторыі беларускай дзяржаўнасці", - адзначыў кіраўнік Адміністрацыі Прэзідэнта.
Паводле слоў Ігара Сергяенкі, праводзімыя саветам у мінулым і бягучым годзе мерапрыемствы сталі састаўнымі часткамі пры рэалізацыі гэтай задачы. Але работу, падкрэсліў ён, неабходна актуалізаваць і, магчыма, напоўніць новым зместам.
Рэспубліканскі савет па гістарычнай палітыцы пры Адміністрацыі Прэзідэнта Беларусі створаны распараджэннем кіраўніка дзяржавы 4 лютага 2022 года - у Год гістарычнай памяці. У склад савета на грамадскіх пачатках увайшлі вучоныя-гуманітарыі, грамадскія дзеячы, прадстаўнікі палітычных партый, грамадскіх аб'яднанняў, экспертнай супольнасці, дзяржорганаў і арганізацый. Ключавую ролю ў рабоце савета выконвае Нацыянальная акадэмія навук, на якую ўскладзена арганізацыйнае, экспертна-аналітычнае і навукова-метадычнае забеспячэнне яго дзейнасці.-0-
