11 снежня, Мінск /Кар. БЕЛТА/. У Беларусі ўнесены змяненні ў палажэнне аб парадку выдачы дазволаў на правядзенне дыягнастычнымі станцыямі дзяржаўнага тэхнічнага агляду транспартных сродкаў. Гэта прадугледжана пастановай Савета Міністраў ад 5 снежня 2024 года нумар 919, апублікаванай на Нацыянальным прававым інтэрнэт-партале, паведамляе БЕЛТА.
Як пракаменціравалі ў Міністэрстве транспарту і камунікацый, дазволы як і раней будзе выдаваць БЕЛНДІТ "ТРАНСТЭХНІКА". Асноўныя новаўвядзенні звязаны з тым, што правядзенне абследавання дыягнастычнай станцыі ўжо будзе ажыццяўляцца ў рамках адміністрацыйнай працэдуры па выдачы дазволу.
Таксама для ўзмацнення кантролю за адпаведнасцю дыягнастычных станцый устаноўленым патрабаванням скарэкціраваны тэрмін дзеяння выдаваемага дазволу. Цяпер дакумент выдаюць на пяць гадоў, а калі змяненні ўступяць у сілу - на два гады.
Унесены змяненні і ў пастанову Савета Міністраў ад 11 чэрвеня 2010 года нумар 903 "Аб некаторых пытаннях функцыянавання сістэмы лічбавых тахографаў", якой зацверджана палажэнне аб парадку выдачы дазволаў на аказанне паслуг (выкананне работ) сэрвіснымі майстэрнямі па ўстаноўцы, актываванні і рамонце лічбавых тахографаў.
"Асноўныя новаўвядзенні звязаны з тым, што правядзенне абследавання сэрвіснай майстэрні ўжо будзе ажыццяўляцца ў рамках адміністрацыйнай працэдуры па выдачы дазволу", - растлумачылі ў ведамстве.
Пастанова ўступае ў сілу праз чатыры месяцы пасля яе апублікавання.-0-
