1 лістапада, Мінск /Кар. БЕЛТА/. У Беларусі з 1 лістапада ўнутрырэспубліканскія перавозкі пасажыраў у нерэгулярных зносінах, у тым ліку аўтамабілямі таксі, выконваюцца па новых правілах, паведамляе БЕЛТА.
Перавозкі могуць ажыццяўляцца толькі пры ўмове ўключэння звестак аб дыспетчарах, перавозчыках, вадзіцелях і транспартных сродках у рэестр аўтамабільных перавозак пасажыраў у нерэгулярных зносінах. У адваротным выпадку яны будуць з'яўляцца незаконнымі і забараняцца.
Адказы на частыя пытанні, звязаныя са стварэннем рэестра, размешчаны на сайце Міністэрства транспарту і камунікацый і Транспартнай інспекцыі.
Новаўвядзенні прадугледжаны ўказам ад 25 студзеня 2024 года нумар 32 "Аб аўтамабільных перавозках пасажыраў". Нормы дакумента накіраваны на забеспячэнне бяспекі аўтамабільных перавозак, стварэнне ўмоў для добрасумленнай канкурэнцыі, павышэнне якасці аказваемых паслуг.
Аператарам рэестра аўтамабільных перавозак пасажыраў у нерэгулярных зносінах вызначана Транспартная інспекцыя. У рэестр уключаюцца звесткі аб аўтамабільных перавозчыках, аб транспартных сродках (аўтобусах, легкавых аўтамабілях, аўтамабілях таксі), вадзіцелях транспартных сродкаў, якія выконваюць аўтамабільныя перавозкі пасажыраў у нерэгулярных зносінах, а таксама аб дыспетчарах аўтамабільных перавозак пасажыраў у нерэгулярных зносінах і дыспетчарах таксі.
Акрамя таго, устаноўлена, што замежная юрыдычная асоба, замежная арганізацыя, створаныя ў адпаведнасці з заканадаўствам замежнай дзяржавы, маюць права аказваць паслугі дыспетчара аўтамабільных перавозак пасажыраў у нерэгулярных зносінах, дыспетчара таксі толькі ў выпадку стварэння імі на тэрыторыі краіны юрыдычнай асобы, асноўным відам дзейнасці якой з'яўляецца аказанне адпаведных паслуг, і ўключэння ў рэестр звестак пра яе.
Да 31 кастрычніка звесткі ўключаліся ў рэестр без спагнання дзяржпошліны.-0-
