26 сакавіка, Мінск /Кар. БЕЛТА/. Купюра Br80 з'явіцца ў Беларусі да 80-годдзя Перамогі савецкага народа ў Вялікай Айчыннай вайне, паведамілі БЕЛТА ў Нацыянальным банку Беларусі.
Праўленнем Нацыянальнага банка 18 сакавіка прынята пастанова нумар 68 "Аб выпуску ў абарачэнне памятнага банкнота і памятных манет, якія з'яўляюцца законным плацежным сродкам Рэспублікі Беларусь".
Выпуск пачнецца з 31 сакавіка. У Нацбанку адзначылі, што банкнот "80 год Перамогі савецкага народа ў Вялікай Айчыннай вайне" будзе наміналам Br80 і выйдзе тыражом 80 тыс. штук. Памятныя манеты "80 год Перамогі савецкага народа ў Вялікай Айчыннай вайне": сярэбраныя - наміналам Br20 выйдуць тыражом 2500 штук, медна-нікелевыя наміналам Br1 - 5000 штук.
На 80-рублёвай купюры будзе выява галоўнага манумента мемарыяльнага комплексу "Брэсцкая крэпасць-герой" - "Мужнасць". На адваротным баку - выява рукі маці, якая трымае руку дзіцяці, на фоне нацыянальнага арнаменту, выявы архітэктурнага комплексу "Вароты Мінска" і кветкі яблыні. Банкнот ярка-ружовага колеру.
Манеты маюць форму круга, з пярэдняга і адваротнага бакоў - кант, які выступае па акружнасці. Бакавая паверхня манет з насечкай. Яны адчаканены ў Казахстане.
Інфармацыя аб паступленнях, адпускных цэнах і наяўнасці памятных манет і банкнотаў у касе Нацыянальнага банка Рэспублікі Беларусь, а таксама запланаваных датах продажаў памятных манет і банкнотаў размешчана на афіцыйным сайце Нацыянальнага банка ў раздзеле "Банкноты і манеты".-0-
