28 чэрвеня, Мінск /Кар. БЕЛТА/. На футбольным чэмпіянаце Беларусі сярод каманд вышэйшай лігі стартуе праграма 14-га тура, паведамляе карэспандэнт БЕЛТА.
У першым сённяшнім паядынку футбалісты "Славіі" прымуць у Мазыры "Гомель" (пачатак гульні ў 19.00). У мінулым туры мазыране спынілі няўдачную серыю, атрымаўшы перамогу ў Наваполацку над мясцовым "Нафтанам" (1:0), гамяльчане ў сябе дома пацярпелі паражэнне ад салігорскага "Шахцёра" (1:2). Таксама сёння брэсцкае "Дынама" згуляе на сваёй арэне з футбалістамі "Віцебска" (пачатак гульні ў 20.45; прамая трансляцыя на тэлеканале "Беларусь 5"). У мінулы ўік-энд брастаўчане прайгралі барысаўскаму БАТЭ (1:3), а віцебская каманда таксама ў гасцях перамагла магілёўскі "Днепр" (2:1).
Галоўныя фаварыты бягучага сезона свае чарговыя матчы правядуць заўтра. Лідары першынства футбалісты жодзінскага "Тарпеда-БелАЗа" сустрэнуцца ў Салігорску з "Шахцёрам", у Гродне "Нёман" будзе сапернічаць са "Смаргонню", а ў Барысаве БАТЭ прыме дзеючага чэмпіёна краіны мінскае "Дынама".
Заключныя гульні 14-га тура пройдуць у нядзелю, 30 чэрвеня: "Слуцк" - "Мінск", "Іслач" (Мінскі раён) - "Днепр", "Арсенал" (Дзяржынск) - "Нафтан".
Пасля 13 тураў становішча ў групе лідараў такое: "Тарпеда-БелАЗ" - 32 ачкі, "Дынама" (Мінск) - 29, "Нёман" - 27, "Дынама" (Брэст) - 22, "Славія" - 22. Спіс лепшых бамбардзіраў узначальвае брэсцкі дынамавец Ягор Карцоў, які забіў дзевяць мячоў.-0-
