4 красавіка, Мінск /Кар. БЕЛТА/. У Брэсцкім абласным цэнтры алімпійскага рэзерву па водных відах спорту стартаваў адкрыты чэмпіянат Беларусі па плаванні, паведамляе карэспандэнт БЕЛТА.
Заяўкі на ўдзел у чэмпіянаце падалі 310 чалавек з Беларусі і Расіі, у ліку саіскальнікаў узнагарод - усе мацнейшыя плыўцы нашай краіны. У першы спаборніцкі дзень спартсмены вызначалі лепшых на васьмі асабістых дыстанцыях, а таксама ў адной эстафеце. Чарговы раз свой узровень пацвердзілі лідары нацыянальнай каманды: Ілья Шымановіч атрымаў перамогу ў фінале на 200 м брасам, Рыгор Пякарскі паказаў лепшы час на дыстанцыі 50 м батэрфляем, Настасся Шкурдай выйграла вырашальны заплыў на 200 м на спіне, а фінал на 50 м брасам застаўся за Алінай Змушко.
Акрамя таго, на дыстанцыі 400 м комплексным плаваннем у жанчын першай фінішавала Аксана Бальшакова, самыя хуткія секунды ў заплыве на 800 м вольным стылем паказала Дар'я Жылінская, а ў фінале на 200 м батэрфляем не было роўных Аліне Жорах. Таксама на дыстанцыі 400 м вольным стылем у мужчын перамогу атрымаў Канстанцін Курачкін. Па выніках змешанай эстафеты 4х100 м кролем на вышэйшую прыступку п'едэстала ўзнялася каманда Мінска ў складзе Рыгора Пякарскага, Марыі Пучанковай, Канстанціна Курачкіна і Настассі Куляшовай.
У сераду на адкрытым чэмпіянаце Беларусі па плаванні ў Брэсце будуць разыграны восем камплектаў медалёў. Турнір прадоўжыцца да 8 красавіка.
