29 чэрвеня, Мінск /Кар. БЕЛТА/. У 2023 годзе будзе забяспечаны далейшы рост пенсій, паведаміла журналістам кіраўнік Фонду сацыяльнай абароны насельніцтва Міністэрства працы і сацыяльнай абароны Юлія Берднікава, перадае карэспандэнт БЕЛТА.
Паводле слоў Юліі Берднікавай, на выплату пенсій накіроўваецца ў год каля 77 працэнтаў расходаў бюджэту Фонду сацыяльнай абароны насельніцтва. Па выніках 2022 года на гэтыя мэты было зрасходавана Br16,2 млрд, у 2023 годзе плануецца накіраваць каля Br18,8 млрд.
"У мінулым годзе Фондам сацыяльнай абароны насельніцтва тройчы ажыццяўляўся пераразлік і павышэнне пенсій, - расказала Юлія Берднікава. - Кіраўніком дзяржавы пастаўлена задача ў бягучым годзе падтрымаць нашых пенсіянераў на ўзроўні 2022 года, калі мы рабілі пераразлік і павышэнне пенсій тройчы. Працуем над яе вырашэннем. Сумесна з Міністэрствам фінансаў выбудоўваем і падлічваем каляндарны план павышэння пенсій. У бягучым годзе адназначна будзем павышаць пенсійныя выплаты адносна названай катэгорыі грамадзян".
Па выніках мінулага года сярэдні памер пенсіі непрацуючага пенсіянера склаў Br602,69, па выніках пяці месяцаў 2023 года - Br676,93.
Як паведамлялася, з 1 мая бягучага года ажыццёўлены пераразлік працоўных пенсій, у выніку якога яны павялічаны ў сярэднім на 5 працэнтаў.
Атрымальнікамі працоўных пенсій з'яўляюцца 2,3 млн чалавек.-0-
