15 ліпеня, Мінск /Кар. БЕЛТА/. Цырымонія ўзнагароджання пераможцаў конкурсу на саісканне прэміі ўрада Беларусі за дасягненні ў галіне якасці 2025 года прайшла ў Палацы Рэспублікі ў Мінску, перадае карэспандэнт БЕЛТА.
Як адзначыў намеснік прэм'ер-міністра Віктар Каранкевіч, у гэтым годзе прэмія прысуджаецца 27-ы раз. Інтарэс да конкурсу з кожным годам узрастае. Гэта эфектыўны інструмент для дэманстрацыі дасягненняў ва ўкараненні інавацыйных, высокаэфектыўных тэхналогій вытворчасці і кіраўніцкіх практык, якія накіраваны на максімальнае задавольванне запатрабаванняў спажыўцоў і ўстойлівае развіццё.
"Удзел у конкурсе - магчымасць аб'ектыўнай, незалежнай ацэнкі вынікаў дзейнасці прадпрыемства ў галіне якасці. А перамога, прысуджэнне прэміі - не толькі прызнанне дзяржавай дастойных вынікаў, але і выдатная магчымасць далейшага перспектыўнага развіцця і рэалізацыі новых праектаў. Павышэнне якасці прадукцыі, якая вырабляецца ў рэальным сектары эканомікі, і ў сферы паслуг знаходзіцца на асаблівым кантролі кіраўніка дзяржавы, урада. Для ўсіх галін вызначаны даволі напружаныя задачы", - сказаў Віктар Каранкевіч.
Вынік праводзімай работы - рост экспарту беларускай прадукцыі і паслуг, а таксама пазнавальнасць нацыянальнага брэнда "Зроблена ў Беларусі" ў больш як 150 краінах свету. За студзень - май 2026 года тэмп росту экспарту тавараў і паслуг у цэлым па краіне склаў 114,6 працэнта да ўзроўню адпаведнага перыяду мінулага года. Калектывы арганізацый-лаўрэатаў унеслі свой уклад ва ўстойлівае развіццё эканомікі, умацаванне тэхналагічнага і вытворчага патэнцыялу, незалежнасці рэспублікі. Віктар Каранкевіч падзякаваў кіраўнікам і супрацоўнікам прадпрыемстваў за высокі прафесіяналізм, адданасць справе, ініцыятыўнасць і высокі ўзровень адказнасці.
"Хацеў вас нацэліць не спыняцца на дасягнутым, рухацца наперад, рэалізоўваць інавацыйныя праекты, укараняць сучаснае абсталяванне, тэхналогіі з аўтаматызацыяй тэхналагічных і бізнес-працэсаў, што ў сваю чаргу будзе дапамагаць падтрымліваць высокі ўзровень якасці і канкурэнтнасці выпускаемай прадукцыі як на ўнутраным рынку, так і за межамі краіны", - сказаў Віктар Каранкевіч.
Ён пажадаў не ўпускаць магчымасці і дасягаць яшчэ больш высокіх паказчыкаў.
Заслужаныя ўзнагароды ўручаны 24 арганізацыям: дзевяць сталі лаўрэатамі прэміі, 15 - пацвердзілі званне лаўрэата паўторна. З іх чатыры арганізацыі ўдастоены спецыяльных узнагарод "Лідарства", "Дасканаласць менеджменту", "Сацыяльная адказнасць", "Беражлівы падыход" - спецузнагарода ўручана ўпершыню ў гісторыі конкурсу.
Пераможцы прадстаўляюць машынабудаўнічую, транспартную, электратэхнічную, харчовую, фармацэўтычную, хімічную галіны, а таксама ўстановы навукі, адукацыі, санаторна-курортных паслуг.
У рамках цырымоніі таксама адзначаны нагрудным знакам "Лідар якасці" кіраўнікі шэрага прадпрыемстваў, якія дасягнулі вышэйшых вынікаў у галіне якасці прадукцыі (паслуг) і сістэмнага менеджменту. Уручаны дыпломы пераможцам конкурсаў "Лепшы менеджар па якасці" і "Лепшая дыпломная і навукова-даследчая работа студэнтаў у галіне менеджменту і кантролю якасці" 2025 года.
Мерапрыемства суправаджала выстаўка прадукцыі прадпрыемстваў - пераможцаў конкурсу 2025 года.
Званне лаўрэата прэміі забяспечвае арганізацыі рэпутацыю надзейнага вытворцы высакаякаснай і канкурэнтаздольнай прадукцыі, садзейнічае пашырэнню рынкаў яе збыту, адкрывае новыя дзелавыя магчымасці.
Лаўрэаты на працягу трох гадоў могуць выкарыстоўваць выяву эмблемы ў маркіроўцы тавараў, дакументацыі, у рэкламных матэрыялах.
Звесткі аб прадпрыемствах-пераможцах размяшчаюцца на сайтах Дзяржстандарту і "КАЧЕСТВО.БЕЛ", уключаюцца ў штогадовы каталог, які накіроўваецца ў прадстаўніцтвы нашай краіны за мяжой.
У ліку лаўрэатаў прэміі - Універсітэт грамадзянскай абароны Міністэрства па надзвычайных сітуацыях, "Мінскхлебпрам", агракамбінат "Дзяржынскі", Баранавіцкі аўтаагрэгатны завод, "Дамачай", "Інвет", Слуцкі сыраробны камбінат, "Белмедпрэпараты", санаторый "Лётцы", ЗАТ "Аўгуст-Бел", Пінскі мясакамбінат, Гродзенскі дзяржаўны медыцынскі ўніверсітэт і інш.-0-
