30 кастрычніка, Мінск /Кар. БЕЛТА/. Пасажырскія паязды ў напрамку Брэста 31 кастрычніка і 1 лістапада будуць ісці па змененым раскладзе і маршруце, паведамілі БЕЛТА ў прэс-цэнтры БЧ.
Змяненні звязаны з планавым капітальным рамонтам чыгуначнага моста на станцыі Лясная на ўчастку Баранавічы - Брэст.
Так, поезд нумар 28/27 Брэст - Масква адпраўленнем з Масквы 30 кастрычніка ў 23.37 будзе рухацца да станцыі Баранавічы-Палескія (час прыбыцця - 11.03). Са станцыі Баранавічы-Палескія поезд адправіцца 31 кастрычніка ў 21.54 і прыбудзе ў Маскву згодна з дзеючым раскладам у 9.37.
Акрамя таго, поезд нумар 52/51 Брэст - Санкт-Пецярбург будзе курсіраваць змененым раскладам на ўчастку Брэст - Баранавічы праз станцыю Лунінец. Поезд нумар 51 Санкт-Пецярбург - Брэст адпраўленнем з Санкт-Пецярбурга 30 кастрычніка будзе ісці праз станцыю Баранавічы-Палескія (9.32 - 10.02) і прыбудзе ў Брэст 31 кастрычніка ў 14.52. Поезд нумар 52 Брэст - Санкт-Пецярбург 31 кастрычніка будзе адпраўляцца з Брэста ў 11.03, рухацца праз станцыю Баранавічы-Палескія (16.20 - 16.50) і далей згодна з дзеючым раскладам.
Асобныя паязды міжрэгіянальных ліній бізнес-класа, якія курсіруюць па маршруце Мінск - Брэст - Мінск, будуць рухацца змененым раскладам і маршрутам Мінск - Баранавічы - Мінск, а некаторыя паязды будуць адменены.
31 кастрычніка асобныя паязды рэгіянальных ліній эканамкласа ў зносінах Брэст - Баранавічы - Брэст будуць курсіраваць змененым раскладам і маршрутам да станцыі Даманава.
"Беларуская чыгунка просіць пасажыраў з разуменнем паставіцца да гэтых абставін і ўлічваць іх пры планаванні паездак. Больш падрабязную інфармацыю аб раскладзе руху паяздоў можна даведацца на афіцыйным інтэрнэт-сайце БЧ, у афіцыйным мабільным дадатку, а таксама па тэлефоне 105 кантакт-цэнтра БЧ. Беларуская чыгунка просіць прабачэння ў пасажыраў за часовыя нязручнасці", - адзначылі ў прэс-цэнтры.-0-
