17 кастрычніка, Мінск /Кар. БЕЛТА/. У Вялікім тэатры Беларусі стартаваў сямейны конкурс "Навагодняя тэатральная цацка", паведамілі БЕЛТА ва ўстанове культуры.
Конкурс праходзіць 11-ы раз у ходзе праекта "Вялікі тэатр - дзецям".
Рэжысёрам святочнага дзейства ў фае выступіць Наталля Бараноўская. Журы конкурсу ўзначаліць галоўны мастак тэатра - Любоў Сідзельнікава. Таксама ў склад тых, хто будзе адбіраць пераможцаў у намінацыях, увойдуць галоўны дырыжор тэатра, народны артыст Башкортастана Арцём Макараў; галоўны рэжысёр тэатра, уладальніца меладя Францыска Скарыны Ганна Маторная; галоўны балетмайстар тэатра, заслужаны артыст Расіі Ігар Колб; загадчыца трупы оперы, народная артыстка Беларусі, салістка оперы Настасся Масквіна; загадчыца трупы балета, уладальніца медаля Францыска Скарыны Ганна Фокіна.
Па ўмовах конкурсу вага цацкі не павінна перасягаць 400 г, а яе памер - 15 см, каб яе лёгка можна было замацаваць на ёлцы. Ад кожнага ўдзельніка (сям'і) прымаецца не больш за адзін выраб.
Узнагароджанне пераможцаў адбудзецца 21 снежня ў 13.00. У перадсвяточнай атмасферы Дзед Мароз і Снягурачка ўручаць пераможцам і ўдзельнікам падарункі і заахвочвальныя прызы.
У гэтым годзе работы ўдзельнікаў конкурсу прымаюцца да 30 лістапада (уключна) па адрасе: 220029, Мінск, пл.Парыжскай Камуны, 1, Вялікі тэатр Беларусі, службовы пад'езд нумар 7 (пост варты). Таксама мінчане могуць прынесці цацку ў тэатр асабіста з 10.00 да 17.00 (штодзённа, акрамя святочных дзён) па адрасе пл.Парыжскай Камуны, 1, 7-ы пад'езд, службовы ўваход.
Даведацца падрабязнасці можна па тэлефонах: +375 17 254-3489, +375 33 901-28-89.-0-
