12 ліпеня, Мінск /Кар. БЕЛТА/. У ВНУ Беларусі стартаваў асноўны прыём дакументаў ад абітурыентаў, паведамляе БЕЛТА.
Прыём дакументаў на бюджэт прадоўжыцца па 17 ліпеня. З 18 па 25 ліпеня пройдуць унутраныя ўступныя іспыты. Залічэнне на бюджэт завершыцца 27 ліпеня.
Прыём дакументаў на платную форму таксама стартаваў сёння, прадоўжыцца ён да 1 жніўня, пры гэтым тыя, хто здае ўнутраныя іспыты ў ВНУ, павінны падаць дакументы да 17 ліпеня. Залічэнне платнікаў завершыцца 3 жніўня.
Гэта датычыцца асноўнага блока спецыяльнасцей, іх пераважная большасць. Пры гэтым ёсць пэўныя варыяцыі ў тэрмінах для некаторых спецыяльнасцей. Так, для асобных спецыяльнасцей сілавога блока прыём дакументаў на бюджэт пройдзе з 12 па 19 ліпеня, уступныя іспыты там адбудуцца 20-21 ліпеня, залічэнне - па 22 ліпеня. Выпускнікі педагагічных, спартыўна-педагагічных класаў, а таксама Нацыянальнага дзіцячага тэхнапарка падаюць дакументы на бюджэт з 12 па 14 ліпеня, іх залічаць па 27 ліпеня. Для сельскагаспадарчых спецыяльнасцей (дзённай бюджэтнай формы) актуальны наступныя тэрміны: падача дакументаў - 12-19 ліпеня, правядзенне ўнутраных уступных іспытаў - 20-25 ліпеня, залічэнне - па 27 ліпеня. На платнае аддзяленне абітурыенты сельгасспецыяльнасцей, якія здаюць унутраныя ўступныя іспыты, падаюць дакументы 12-19 ліпеня, у тых, хто не здае, прыём дакументаў прадоўжыцца па 2 жніўня, залічэнне ў абедзвюх катэгорый пройдзе па 3 жніўня. Прыём і залічэнне ў сельскагаспадарчыя ВНУ на завочнае аддзяленне пройдзе па 20 снежня.
Усяго ўстановы вышэйшай адукацыі краіны прымуць каля 50,6 тыс. абітурыентаў, пры гэтым 31,4 тыс. - на бюджэт, 19,2 тыс. - на платнай аснове.-0-
