9 жніўня, Мінск /Кар. БЕЛТА/. Пастановай Савета Міністраў ад 6 жніўня нумар 580 зацвярджаецца палажэнне аб працэдуры папярэдняй абгрунтаванай згоды ў дачыненні да асобных небяспечных хімічных рэчываў і пестыцыдаў у знешнегандлёвай дзейнасці, прадугледжанае Ратэрдамскай канвенцыяй, прынятай у Ратэрдаме ў верасні 1998 года, паведамляе БЕЛТА са спасылкай на Нацыянальны прававы інтэрнэт-партал.
За выкананне абавязацельстваў, прынятых Беларуссю па Ратэрдамскай канвенцыі, адказнае Міністэрства аховы здароўя. Пералік хімічных рэчываў, у дачыненні да якіх прымяняецца названая працэдура, уключае больш за 50 найменняў.
Для папярэдняй абгрунтаванай згоды назначаным нацыянальным органам улічваецца прадастаўленая экспарцёрамі або імпарцёрамі інфармацыя аб хімічных рэчывах і пестыцыдах, іх небяспечных уласцівасцях, катэгорыі або падкатэгорыі выкарыстання, аб тыпе абмежавання выкарыстання. Таксама прымаюцца пад увагу інфармацыя, змешчаная на маркіроўцы хімічнага рэчыва, нанесеная на ўпакоўку або этыкетку, якая ўключае ў тым ліку даты вытворчасці і заканчэння тэрміну прыгоднасці, і даныя пашпарта бяспекі хімічнай прадукцыі.
Па запыце Міністэрства аховы здароўя кожны імпарцёр хімічных рэчываў прадастаўляе інфармацыю і пашпарт бяспекі хімічнай прадукцыі, уключаючы інфармацыю аб колькасці імпартуемага ў Беларусь хімічнага рэчыва або сумесі, што змяшчае хімічнае рэчыва ў канцэнтрацыі большай за 0,1 працэнта. Пры прадастаўленні экспарцёрам або імпарцёрам інфармацыі не ў поўным аб'ёме і непрадастаўленні пашпарта бяспекі хімічнай прадукцыі назначаны нацыянальны орган запытвае інфармацыю, якой не хапае.
Экспарцёр, які мае намер упершыню экспартаваць з Беларусі хімічнае рэчыва або сумесь, накіроўвае назначанаму нацыянальнаму органу краіны-імпарцёра інфармацыю аб намеры экспартаваць хімічнае рэчыва і ўсе неабходныя даныя аб хімрэчыве і сумесі. Назначаны нацыянальны орган пры накіраванні паведамленняў аб экспарце: рэгіструе кожнае паведамленне аб экспарце, правярае адпаведнасць інфармацыі, накіроўвае яго назначанаму нацыянальнаму органу імпартуючага боку не пазней за 30 дзён з даты рэгістрацыі паведамлення аб экспарце, прымае меры, неабходныя для атрымання адказу, накіроўвае паведамленне аб экспарце паўторна у выпадку неабходнасці, а таксама звяртаецца для кансультацый у Сакратарыят Ратэрдамскай канвенцыі ў выпадку неатрымання ад імпартуючага боку адказу на працягу 60 дзён пасля накіравання паведамленняў аб экспарце.
Папярэдняя абгрунтаваная згода на імпарт выдаецца назначаным нацыянальным органам у адказ на паведамленне аб экспарце. Рашэнне аб імпарце хімрэчыва прымаецца на працягу 30 дзён з даты рэгістрацыі паведамлення аб экспарце зыходзячы з магчымай рызыкі для здароўя і навакольнага асяроддзя канкрэтнага хімічнага рэчыва. Пры выдачы папярэдняй абгрунтаванай згоды на імпарт назначаны нацыянальны орган правярае папярэднюю абгрунтаваную згоду, выдадзеную раней.
Пастанова ўступае ў сілу пасля афіцыйнага апублікавання.-0-
