Урад вызначыў графік пераносу рабочых дзён у 2024 годзе. Адпаведную пастанову падпісаў прэм'ер-міністр Беларусі Раман Галоўчанка, паведамілі БЕЛТА ў прэс-службе ўрада.
Прадугледжаны перанос рабочага дня з 13 мая на 18 мая. Днямі адпачынку будуць 11 (субота), 12 (нядзеля), 13 (панядзелак) і 14 мая (аўторак) - 4 дні.
Таксама запланаваны перанос рабочага дня з 8 лістапада на 16 лістапада. Днямі адпачынку будуць 7 (чацвер), 8 (пятніца), 9 (субота) і 10 лістапада (нядзеля) - 4 дні.
Як праінфармавалі ў прэс-службе Міністэрства працы і сацыяльнай абароны, арганізацыям з улікам спецыфікі вытворчасці (работы) прадастаўляецца права самастойна ўстанаўліваць іншы парадак пераносу рабочага дня.
Пры гэтым пераносы рабочых дзён распаўсюджваюцца толькі на работнікаў, якія працуюць у рэжыме пяцідзённага рабочага тыдня з выхаднымі днямі ў суботу і нядзелю.
Нерабочымі днямі ў 2024 годзе з'яўляюцца: 1 і 2 студзеня - Новы год, 7 студзеня - Раство Хрыстова (праваслаўнае Раство), 8 сакавіка - Дзень жанчын, 1 мая - Свята працы, 9 мая - Дзень Перамогі, 14 мая - Радаўніца (па календары праваслаўнай канфесіі), 3 ліпеня - Дзень Незалежнасці Рэспублікі Беларусь (Дзень Рэспублікі), 7 лістапада - Дзень Кастрычніцкай рэвалюцыі, 25 снежня - Раство Хрыстова (каталіцкае Раство).
