Усебеларуская акцыя "Мы - грамадзяне Беларусі!", прысвечаная Дню Канстытуцыі, стартуе 10 сакавіка, паведаміла карэспандэнту БЕЛТА сакратар ЦК БРСМ Хрысціна Сарока.
"Вельмі сімвалічна, што акцыя стартуе ў Канстытуцыйным Судзе Рэспублікі Беларусь, які адыгрывае важную ролю ў ахове канстытуцыйных правоў і свабод грамадзян нашай краіны, абароне канстытуцыйнага ладу, - адзначыла Хрысціна Сарока. - Галоўнымі героямі ўрачыстасці стануць 14-гадовыя юнакі і дзяўчаты - прадстаўнікі ўсіх абласцей і горада Мінска, усяго 27 чалавек. Пашпарт грамадзяніна Рэспублікі Беларусь маладым людзям уручаць старшыня Канстытуцыйнага Суда Рэспублікі Беларусь, заслужаны юрыст Беларусі Пётр Міклашэвіч і член Пастаяннай камісіі Савета Рэспублікі па міжнародных справах і нацыянальнай бяспецы, першы сакратар ЦК БРСМ Аляксандр Лук'янаў".
У падарунак юнакі і дзяўчаты традыцыйна атрымаюць Канстытуцыю, а таксама вокладку на пашпарт і кніжнае выданне "Сімвалы Беларусі".
"Мерапрыемствы патрыятычнай акцыі пройдуць 10-15 сакавіка ва ўсіх рэгіёнах Беларусі. Напярэдадні і ў Дзень Канстытуцыі Беларусі 14-гадовым падлеткам ва ўрачыстай абстаноўцы ўручаць галоўны дакумент - пашпарт грамадзяніна Рэспублікі Беларусь", - дапоўніла Хрысціна Сарока.
Патрыятычная ініцыятыва была прапанавана БРСМ у 2004 годзе. За гэтыя гады яна набыла шырокую папулярнасць сярод моладзі і па праву лічыцца адной з важных традыцый нашай краіны. Урачыстае ўручэнне нацыянальных пашпартоў падлеткам падкрэслівае іх пераход у дарослае жыццё, дае магчымасць лепш усвядоміць, што цяпер яны сталі паўнапраўнымі грамадзянамі Беларусі, адказнымі перад ёй і яе законамі.
Дзень Канстытуцыі Беларусі штогод адзначаецца 15 сакавіка як дзяржаўнае свята. Асноўны закон вызначае асновы дзяржаўнай улады і грамадскага жыцця, гарантуе асноўныя правы і свабоды грамадзян, вызначае асновы дэмакратычнай сацыяльнай прававой дзяржавы, а таксама з'яўляецца важным фактарам для фарміравання грамадзянскай ідэнтычнасці і нацыянальнай самабытнасці беларусаў.-0-
