9 сакавіка, Мінск /Кар. БЕЛТА/. Усебеларуская акцыя "Мы - грамадзяне Беларусі!", прысвечаная Дню Канстытуцыі, стартуе сёння ў Канстытуцыйным Судзе ў Мінску. Аб гэтым карэспандэнту БЕЛТА паведаміла сакратар ЦК БРСМ Святлана Паўленіна.
Галоўнымі героямі ўрачыстасці стануць 14-гадовыя юнакі і дзяўчаты - прадстаўнікі ўсіх абласцей і горада Мінска. Усяго 25 чалавек. Пашпарт грамадзяніна Рэспублікі Беларусь маладым людзям уручаць старшыня Канстытуцыйнага Суда Сяргей Сівец і першы сакратар Цэнтральнага камітэта БРСМ Уладзімір Паўлоўскі. Традыцыйна ў рамках цырымоніі юнакам і дзяўчатам уручаюцца таксама сімвалічныя падарункі. Удзельнікі мерапрыемства атрымаюць брэндзіраваны бокс з Канстытуцыяй і дзяржаўным сцягам, а таксама спілс-карту - набор магнітных элементаў, выкананых у форме тэрытарыяльных адзінак нашай краіны.
Патрыятычная ініцыятыва была прапанавана БРСМ у 2004 годзе. За гэтыя гады яна набыла шырокую папулярнасць сярод моладзі і па праву лічыцца адной з важных традыцый нашай краіны. Урачыстае ўручэнне пашпартоў падлеткам падкрэслівае іх пераход у дарослае жыццё, дае магчымасць яшчэ лепш усвядоміць, што цяпер яны сталі паўнапраўнымі грамадзянамі Беларусі, адказнымі перад ёй і яе законамі. Дзень Канстытуцыі Беларусі штогод адзначаецца 15 сакавіка. Асноўны закон вызначае асновы дзяржаўнай улады і грамадскага жыцця, гарантуе асноўныя правы і свабоды грамадзян, вызначае асновы дэмакратычнай сацыяльнай прававой дзяржавы, а таксама з'яўляецца важным фактарам для фарміравання грамадзянскай ідэнтычнасці і нацыянальнай самабытнасці беларусаў.
Мерапрыемствы акцыі пройдуць 9-15 сакавіка ва ўсіх рэгіёнах Беларусі.-0-
