10 лістапада, Мінск /Кар. БЕЛТА/. Працоўную пуцёўку для работы на Усебеларускай маладзёжнай будоўлі на аб'ектах будаўніцтва адукацыйна-аздараўленчай установы "Рэспубліканскі цэнтр патрыятычнага выхавання моладзі" на базе Кобрынскага ўмацавання Брэсцкай крэпасці ўручаць студэнцкаму будаўнічаму атраду "Спадчына" імя Героя Савецкага Саюза П.М.Машэрава 11 лістапада, паведаміў карэспандэнту БЕЛТА першы сакратар Цэнтральнага камітэта Беларускага рэспубліканскага саюза моладзі Аляксандр Лук'янаў.
"Як і планавалася, мы стартуем на новай УМБ у лістападзе. Прадстаўнікі Беларускіх студэнцкіх атрадаў, валанцёрскага пула БРСМ, Брэсцкага абласнога выканаўчага камітэта, Міністэрства абароны ўжо ў гэту суботу пачнуць работы на новай Усебеларускай маладзёжнай будоўлі, - сказаў Аляксандр Лук'янаў. - Першым сярод студатрадаў працоўную пуцёўку для работы на знакавым аб'екце атрымае будатрад, сфарміраваны на базе Брэсцкага дзяржаўнага тэхнічнага ўніверсітэта, які выдатна зарэкамендаваў сябе на Усебеларускай маладзёжнай будоўлі ў Хатыні. Вельмі сімвалічна, што менавіта "Спадчына" стане першапраходцам УМБ у Брэсцкай крэпасці яшчэ і таму, што менавіта камандзір гэтага атрада Сямён Люльковіч звярнуўся да нашага Прэзідэнта Аляксандра Лукашэнкі з просьбай даверыць БРСМ удзел у стварэнні рэспубліканскага патрыятычнага цэнтра ў Брэсцкай крэпасці і аб'явіць яго будаўніцтва Усебеларускай маладзёжнай будоўляй. Студэнцкі будатрад складаецца з 15 чалавек. Хлопцы і дзяўчаты будуць выконваць падсобныя работы - разбіранне падлог, адбіванне тынку і іншыя".
Паводле яго слоў, у час урачыстай цырымоніі сімвалічнага старту УМБ у Брэсцкай крэпасці БРСМ перадасць для патрыятычнага цэнтра сертыфікат на Br200 тыс. "Усяго пры падтрымцы Штаба патрыятычных сіл Беларусі БРСМ сабрана Br215 тыс., Br15 тыс. з якіх былі перададзены раней. Збор сродкаў будзе прадоўжаны. Роля грамадскіх інстытутаў - прадаставіць магчымасць кожнаму ўнесці свой уклад у будаўніцтва цэнтра выхавання маладых патрыётаў Беларусі. Мы будзем і ў далейшым праводзіць шырокую інфармацыйную работу з насельніцтвам", - растлумачыў першы сакратар ЦК БРСМ.
Як паведамлялася, аб'ектам будаўніцтва адукацыйна-аздараўленчай установы "Рэспубліканскі цэнтр патрыятычнага выхавання моладзі" на базе Кобрынскага ўмацавання Брэсцкай крэпасці прысвоены статус Усебеларускай маладзёжнай будоўлі. Адпаведны ўказ нумар 257 Прэзідэнт Беларусі Аляксандр Лукашэнка падпісаў 9 жніўня. Згодна з указам да работ на гэтых аб'ектах будуць прыцягнуты маладыя людзі ва ўзросце ад 14 да 31 года, у тым ліку ў складзе студэнцкіх атрадаў.-0-
