20 мая, Мінск /Кар. БЕЛТА/. Усебеларускі форум студэнцкіх атрадаў, прысвечаны 80-годдзю вызвалення Беларусі ад нямецка-фашысцкіх захопнікаў, пройдзе 21-22 мая ў Брэсце, паведаміла карэспандэнту БЕЛТА афіцыйны прадстаўнік ЦК БРСМ, камандзір Рэспубліканскага штаба студэнцкіх атрадаў Надзея Шахоўская.
Удзельнікаў мерапрыемства, імі стануць амаль 500 байцоў, камандзіраў і камісараў студэнцкіх атрадаў, а таксама кіраўнікоў органаў дзяржаўнага кіравання, міністэрстваў і ведамстваў, ветэранаў студатрадаўскага руху, чакае насычаная праграма. "Стартуе форум 21 мая каля манумента "Мужнасць" на тэрыторыі мемарыяльнага комплексу "Брэсцкая крэпасць - герой", дзе пройдзе ўрачыстае шэсце "Беларусь памятае", ускладанне кветак ад удзельнікаў студэнцкіх атрадаў, пасля чаго маладыя людзі мінутай маўчання ўшануюць памяць загінулых у Вялікай Айчыннай вайне", - расказала Надзея Шахоўская.
У рамках форуму таксама пройдзе I Рэспубліканскі злёт ветэранаў студатрадаўскага руху Беларусі, які аб'яднае прадстаўнікоў студэнцкіх атрадаў розных пакаленняў з усіх рэгіёнаў Беларусі. Госці мерапрыемства прымуць удзел у працоўнай акцыі на аб'ектах будаўніцтва Рэспубліканскага цэнтра патрыятычнага выхавання моладзі і на тэрыторыі Брэсцкай крэпасці, азнаёмяцца з гісторыяй комплексу на аглядных і тэматычных экскурсіях.
"У рамках інфармацыйна-асветнага праекта "Заліковая размова" моладзь з ганаровымі гасцямі мерапрыемства абмяркуе актуальныя грамадска-палітычныя тэмы і пытанні развіцця руху студэнцкіх атрадаў. Фінальным пунктам першага дня форуму стане прагляд кінафільма "Брэсцкая крэпасць" пад адкрытым небам, - адзначыла Надзея Шахоўская. - 22 мая госці форуму прымуць удзел у здачы нарматываў фізкультурна-спартыўнага комплексу БСА "Змагайся! Імкніся! Перамагай!", рабоце тэматычных пляцовак па гісторыі студатрадаўскага руху, праявяць свае веды ў інтэлектуальнай віктарыне "80 гадоў з дня вызвалення Беларусі ад нямецка-фашысцкіх захопнікаў".
Працаўладкаванне моладзі (студатрадаўскі рух) - адзін з прыярытэтных напрамкаў дзейнасці БРСМ. У бягучым годзе ў пералікі прымаючых арганізацый, аб'ектаў, відаў работ і колькасці рабочых месцаў для ўдзельнікаў студэнцкіх атрадаў, зацверджаныя райгарвыканкамамі, адміністрацыямі раёнаў Мінска, унесена 1766 аб'ектаў на 47 218 рабочых месцаў.-0-
