14 жніўня, Мінск /Кар. БЕЛТА/. Беларусь на конкурсе маладзёжнай песні 17-га фестывалю "Моладзь - за Саюзную дзяржаву" прадставяць восем выканаўцаў, паведамляе карэспандэнт БЕЛТА.
Адборачны тур конкурсу выканаўцаў маладзёжнай песні фестывалю "Моладзь - за Саюзную дзяржаву" (ад Беларусі) прайшоў сёння ў Нацыянальным цэнтры мастацкай творчасці дзяцей і моладзі ў Мінску. Кожны ўдзельнік адборачнага тура прадставіў дзве песні, адна з якіх раскрывала тэмы любові да Радзімы, роднага краю, подзвігу народа, а другая адлюстроўвала сучасныя маладзёжныя тэндэнцыі. Песні выконваліся на рускай і беларускай мовах. Паводле ўмоў конкурсу, усе выступленні праходзілі пад фанаграму "мінус адзін". Парадак выступлення ўдзельнікаў адборачнага тура быў вызначаны жараб'ёўкай. Ацэньвала вакальныя даныя і выканальніцкае майстэрства ўдзельнікаў прафесійнае журы.
У выніку журы вызначыла наступны склад удзельнікаў, якія будуць прадстаўляць Беларусь на конкурсе: Ангеліна Самалётава (Мінск), Яраслава Сокал (Мінск), Міхаліна Хвясюк (Брэсцкая вобласць), Андрэй Цуба (Мінск), Надзея Дзегцярова (Магілёў), Дар'я Часлаўская (Магілёў), Вікторыя Касцюкова (Гродзенская вобласць) і Арцём Палкін (Мінская вобласць).
Па ініцыятыве Парламенцкага сходу Саюза Беларусі і Расіі з 11 па 15 верасня 2024 года на тэрыторыі Смаленскай вобласці пройдзе XVII фестываль "Моладзь - за Саюзную дзяржаву". Беларускі рэспубліканскі саюз моладзі фарміруе склад дэлегацыі ад Беларусі і забяспечвае яе ўдзел у фестывалі. У мерапрыемствах фестывалю прымуць удзел дэпутаты Парламенцкага сходу Саюза Беларусі і Расіі, дзяржаўныя, грамадскія і палітычныя дзеячы, прадстаўнікі грамадскіх арганізацый рэгіёнаў Расіі і Беларусі, маладзёжныя мастацкія калектывы, студэнты, удзельнікі і пераможцы маладзёжных конкурсных мерапрыемстваў СД, вядомыя артысты і дзеячы культуры, прадстаўнікі сродкаў масавай інфармацыі з Расіі і Беларусі. Агульная колькасць удзельнікаў фестывалю - амаль 300 чалавек, а разам з гледачамі і гасцямі дасягне 15 тыс.
Праграма форуму абяцае быць насычанай і цікавай. На працягу фестывальнага тыдня пройдуць урачыстае адкрыццё і закрыццё фестывалю, выязныя канцэрты ў гарады Смаленскай вобласці, тэматычныя праграмы для ўдзельнікаў фестывалю, сустрэчы з ветэранамі вайны і працы, студэнтамі ВНУ, вечары дружбы моладзі Беларусі і Расіі і інш.
Яркай падзеяй праграмы фестывалю стане конкурс выканаўцаў маладзёжнай песні, у якім прымуць удзел маладыя людзі ва ўзросце ад 16 да 25 гадоў: салісты, аўтары-выканаўцы, дуэты, ансамблі. Паводле ўмоў конкурсу, удзел у ім прымаюць не больш за два саіскальнікі ад аднаго горада або вобласці. Усяго для ўдзелу ў конкурсе дапускаецца не больш за 20 канкурсантаў: ад Расіі - да 12 чалавек, ад Беларусі - да 8 канкурсантаў.-0-
