24 ліпеня, Мінск /Кар. БЕЛТА/. 24 ліпеня 1944 года на Брэсцкім напрамку нашы войскі, адбіваючы контратакі пяхоты і танкаў праціўніка, прадаўжалі весці наступальныя баі, у ходзе якіх занялі больш за 80 населеных пунктаў.
Войскі 1-га Беларускага фронту, развіваючы паспяховае наступленне, авалодалі горадам і буйным чыгуначным вузлом Люблінам.
Паводле зводак Саўінфармбюро, у выніку наступальных аперацый, праведзеных з 23 чэрвеня па 23 ліпеня 1944 года ў цесным узаемадзеянні чатырох франтоў - 1-га Прыбалтыйскага, 1-га, 2-га і 3-га Беларускіх і завершаных разгромам на савецка-германскім фронце цэнтральнай групоўкі войскаў праціўніка, вызваленнем сталіцы Беларусі горада Мінск, сталіцы Савецкай Літвы горада Вільнюс і важнейшых гарадоў - Віцебска, Магілёва, Вілейкі, Баранавіч, Пінска, Полацка, Оршы, Бабруйска, Барысава, Жлобіна, Ковеля, Асіповіч, Маладзечна, Гродна, Ліды, Слоніма, Ваўкавыска, Паневяжыса, "страты немцаў па галоўных відах баявой тэхнікі і жывой сіле складаюць: забітымі больш за 381 тыс. салдат і афіцэраў, самалётаў - 631, танкаў і самаходнай зброі - 2735, зброі розных калібраў - 8702, мінамётаў - 5695, кулямётаў - 23 071, аўтамашын - 57 152".-0-
