15 жніўня, Мінск /Кар. БЕЛТА/. Хакейны клуб "Брэст" пачынае выступленні ў розыгрышы Еўра-Азіяцкага Кубка Дружбы па хакеі 2024 года, паведамляе карэспандэнт БЕЛТА.
Еўра-Азіяцкі Кубак Дружбы складаецца з кваліфікацыйнага этапу і суперфіналу, на турніры выступяць шэсць каманд з чатырох краін. Першы раўнд розыгрышу прымае сталіца Узбекістана Ташкент. Беларускую экстралігу на гэтым этапе прадставіць "Брэст", які стаў удзельнікам Кубка дзякуючы заваяванню сярэбраных медалёў чэмпіянату Беларусі сезона-23/24. Кампанію брастаўчанам у групе складуць ташкенцкі "Хумо", сярэбраны прызёр Усерасійскай хакейнай лігі АКМ з Тулы, а таксама чэмпіён Казахстана "Арлан" з Какшэтау.
Першым сапернікам "зуброў" на міжнароднай арэне стане гаспадар лёду "Хумо", паядынак стартуе сёння ў 17:00 па мінскім часе. 17 жніўня наша каманда згуляе супраць "Арлана", а на наступны дзень - з АКМ. Клубы, якія занялі ў групе першае і другое месцы, выйдуць у "фінал чатырох", які адбудзецца ў студзені 2025 года. Удзел у фінальным турніры ўжо забяспечылі чэмпіён Беларусі жлобінскі "Металург" і ўладальнік галоўнага трафея УХЛ "Нафтавік" з Альмецьеўска.
Еўра-Азіяцкі Кубак Дружбы арганізаваны трэці раз. У 2022 годзе перамогу ў дэбютным розыгрышы турніру, што тады меў назву Кубак Саюза, атрымаў цюменскі "Рубін", які абыграў у фінале "Металург". У мінулым годзе чэмпіёнскі трафей заваявалі хакеісты васкрасенскага "Хіміка", якія былі мацнейшымі за краснаярскі "Сокал". Абодва разы матчы галоўнай стадыі прымаў Лядовы палац у Жлобіне.-0-
