27 мая, Мінск /Кар. БЕЛТА/. Начальнік галоўнага ўпраўлення раслінаводства Міністэрства сельскай гаспадаркі і харчавання Мікалай Лешык расказаў у час круглага стала "Падвядзенне вынікаў пасяўной кампаніі. Складаныя ўмовы надвор'я і разлікі на ўраджай" у прэс-цэнтры БЕЛТА аб тым, якія меры прымаюць аграрыі краіны для атрымання дастойнага ўраджаю ў бягучым годзе.
Чарговы вясенні перыяд жыцця аграрыяў у частцы сяўбы завяршаецца, адзначыў Мікалай Лешык. "З дня на дзень мы завершым сяўбу ўсіх сельскагаспадарчых культур. Найбольш цеплалюбівыя з іх - гэта грэчка, проса і, зразумела, кукуруза. Апошняя мала таго, што цеплалюбівая культура, але яе пасеялі на вельмі вялікай плошчы - больш за 1,2 млн га. Таму гэта заняло працяглы час", - адзначыў ён.
У цэлым, паводле слоў начальніка галоўнага ўпраўлення, пасяўная ўжо даўно завяршылася б, калі б не складанасці ў выглядзе майскіх замаразкаў. "Напэўна, аграномы нашы ўжо расслабіліся б і займаліся б нарыхтоўкай кармоў. На жаль, задача ўскладнілася. Каля 76 тыс. га пасеваў, паводле папярэдніх даных, загінула ці ж пашкоджана ў значнай ступені. Яны не будуць прыдатныя да вырошчвання ў далейшым", - звярнуў увагу ён.
Работу па перасяванні міністэрства ўжо вядзе - загінулыя пасевы буракоў, лёну і кукурузы перасеяны ўжо. Вядзецца работа па ўдакладненні вердыкту па пашкоджаных пасевах збожжавых і крыжакветных культур, а таксама прыняцці рашэнняў па іх перасяванні.
Асноўная задача - захаваць збожжавую групу, каб атрымаць тыя аб'ёмы збожжа, на якія нацэліў аграрыяў кіраўнік дзяржавы і ўрад, лічыць Мікалай Лешык. "Было прынята рашэнне аб павелічэнні плошчы кукурузы на зерне на 94 тыс. га да ўзроўню 2024 года ў рамках кампенсацыі. Пры гэтым практычна на 70 тыс. га з улікам пашкоджанняў будзе зніжана група каласавых культур. У цэлым збожжавы клін застаецца крыху вышэйшв за ўзровень 1 чэрвеня 2024 года", - расказаў ён.
Гэтыя мерапрыемствы - фундамент у рабочым плане аграрыя для атрымання зададзеных аб'ёмаў прадукцыі. Далей па плане вядзецца догляд пасеваў. "Зразумела, вядзём і работы па рэабілітацыі тых пасеваў, якія ў меншай ступені пашкоджаны. Яны магчыма будуць захаваны з нейкімі змяненнямі. Вядуцца актыўна падкормкі азотнымі ўгнаеннямі, будуць праводзіцца і вядуцца работы па ахове пашкоджаных пасеваў, у першую чаргу ад хвароб, - заўважыў начальнік галоўнага ўпраўлення. - Упэўнены, што ўсё гэта нам дасць магчымасць атрымаць дастойны ўраджай, забяспечыць харчовую бяспеку, забяспечыць кармавую базу для далейшага атрымання прадукцыі".-0-
