18 мая, Мінск /Кар. БЕЛТА/. Зацверджаны пералік алімпіяд і конкурсаў, пераможцы якіх могуць паступаць у ВНУ без экзаменаў у 2023 годзе. Гэта прадугледжана пастановай Міністэрства адукацыі ад 27 красавіка 2023 года нумар 143, паведамляе БЕЛТА са спасылкай на Нацыянальны прававы інтэрнэт-партал.
Так, устаноўлены пералік міжнародных алімпіяд, пераможцы (дыпломы I, II, III ступені) якіх маюць права на залічэнне ў 2023 годзе без уступных іспытаў ва ўстановы вышэйшай адукацыі Беларусі для атрымання агульнай вышэйшай і спецыяльнай вышэйшай адукацыі, а таксама па-за конкурсам для атрымання сярэдняй спецыяльнай адукацыі. У гэты пералік уключана 9 мерапрыемстваў, сярод якіх Міжнародная матэматычная алімпіяда (2023 год, Японія), Міжнародная алімпіяда па інфарматыцы (2023 год, Венгрыя), Міжнародная біялагічная алімпіяда (2023 год, Аб'яднаныя Арабскія Эміраты), Еўрапейская геаграфічная алімпіяда (2023 год, Сербія), Алімпіяда школьнікаў Саюзнай дзяржавы па рускай мове і рускай літаратуры "Расія і Беларусь: гістарычная і духоўная агульнасць" (2022 год, Расія).
Таксама вызначаны пералік вучэбных прадметаў трэцяга (абласнога, Мінскага гарадскога) этапу рэспубліканскай алімпіяды па вучэбных прадметах, праведзенай Міністэрствам адукацыі ў навучальным годзе, які завяршыўся ў год прыёму. Пераможцы (дыпломы I, II, III ступені) гэтага этапу маюць права на залічэнне без уступных іспытаў пры паступленні ў адпаведнасці з дагаворам аб мэтавай падрыхтоўцы спецыяліста з вышэйшай адукацыяй на найбольш запатрабаваныя эканомікай спецыяльнасці ў ВНУ для атрымання вышэйшай адукацыі ў 2023 годзе. У гэтым пераліку 16 найменняў вучэбных прадметаў: беларуская мова і літаратура, руская мова і літаратура, англійская, нямецкая і французская мовы, матэматыка, фізіка, астраномія, біялогія, хімія, геаграфія, гісторыя Беларусі, грамадазнаўства, працоўнае навучанне.
Згодна з дакументам пераможцам (дыпломы I, II або III ступені) V Рэспубліканскага конкурсу прафесійнага майстэрства прадастаўлена права на залічэнне ў 2023 годзе без уступных іспытаў у ВНУ для атрымання вышэйшай адукацыі за высокія дасягненні ў асобных намінацыях (кампетэнцыях) гэтага конкурсу, якія адпавядаюць выбранаму профілю (напрамку) адукацыі. Таксама яны змогуць паступіць па-за конкурсам для атрымання сярэдняй спецыяльнай адукацыі па спецыяльнасцях, якія адпавядаюць намінацыям (кампетэнцыям) гэтага конкурсу.
Пастанова ўступае ў сілу пасля яе афіцыйнага апублікавання.-0-
