Адзіны маёмасны плацеж плануюць увесці ў Беларусі з 2025 года. Аб гэтым заявіў міністр фінансаў Юрый Селіверстаў у час сустрэчы ў Авальнай зале Дома ўрада з дэпутатамі Палаты прадстаўнікоў і членамі Савета Рэспублікі па разглядзе праектаў законаў "Аб рэспубліканскім бюджэце на 2024 год", "Аб змяненні Падатковага кодэкса Рэспублікі Беларусь", перадае карэспандэнт БЕЛТА.
"У рамках удасканалення падатковага адміністравання законапраектам аб змяненні Падатковага кодэкса прадугледжана спагнанне з фізічных асоб з 2025 года адзінага маёмаснага плацяжу, які будзе ўключаць у сябе суму транспартнага падатку, падатку на нерухомую маёмасць і зямельнага падатку", - сказаў Юрый Селіверстаў.
Базавымі мерамі фіскальнага характару, закладзенымі пры падрыхтоўцы Падатковага кодэкса, з'яўляюцца індэксацыя на прагнозны параметр інфляцыі ставак падаткаў, устаноўленых у беларускіх рублях, а таксама павелічэнне ставак акцызаў, таксама з улікам міжнародных абавязацельстваў у рамках дагавора з РФ аб агульных прынцыпах падаткаабкладання па ўскосных падатках.
У частцы спагнання звышдаходаў грамадзян і арганізацый, сфарміраваных у высокадаходных сферах дзейнасці, у тым ліку ў розных гандлёвых сетках, законапраектам "Аб змяненні Падатковага кодэкса Рэспублікі Беларусь" прадугледжваецца павелічэнне стаўкі падатку на прыбытак да 25 працэнтаў пры атрыманні прыбытку звыш Br25 млн у год. Што датычыцца фізічных асоб, чый даход за каляндарны год перавысіць Br200 тыс., стаўка падатку складзе 25 працэнтаў з сумы перавышэння. Сярод змяненняў - павелічэнне падатковых спагнанняў ва ўладальнікаў люксавых аўтамабіляў, з года выпуску якіх прайшло не больш за тры гады: транспартны падатак вылічваецца па стаўках, павялічаных у дзесяць разоў.
"Яшчэ адно змяненне - устанаўленне стаўкі падаходнага падатку для індывідуальных прадпрымальнікаў у памеры 30 працэнтаў пры атрыманні валавой выручкі звыш Br500 тыс. у год. З далейшым спыненнем з наступнага года дзейнасці ў якасці ІП", - дадаў міністр.
У рамках работы па скарачэнні дэфіцыту кадраў рабочых прафесій будзе прадастаўляцца дадатковы штомесячны падатковы вылік па падаходным падатку ў памеры Br620 выпускнікам ВНУ, ССНУ і прафесійна-тэхнічных устаноў, накіраваных на работу па размеркаванні. Такі вылік будзе прадастаўляцца на працягу ўсяго часу абавязковай адпрацоўкі і наступнага прадаўжэння кантракта, але на тэрмін не большы за 7 гадоў.-0-
