Дзякуючы планамернай і паслядоўнай рабоце ў сферы энергазберажэння, павышэння энергаэфектыўнасці і павелічэння выкарыстання аднаўляльных крыніц энергіі, у Беларусі энергаёмістасць ВУП была зніжана ў 3,4 раза. Такую заяву на 15-й сесіі Асамблеі Міжнароднага агенцтва па аднаўляльнай энергіі ў Абу-Дабі зрабіў часовы павераны ў справах, старшы саветнік пасольства Беларусі ў ААЭ Дзяніс Мілеўскі, паведамілі карэспандэнту БЕЛТА ў Дэпартаменце па энергаэфектыўнасці.
"Для Беларусі электрыфікацыя і павышэнне энергаэфектыўнасці з дапамогай аднаўляльных крыніц энергіі, укаранення тэхналогій выкарыстання ўстойлівай біямасы і ў перспектыве чыстага вадароду застаюцца найбольш рэалістычнымі шляхамі для дапамогі стрымліванню росту глабальнай сярэдняй тэмпературы", - абазначыў Дзяніс Мілеўскі.
Сёння ў рэспубліцы распрацоўваецца ўжо сёмая па ліку дзяржаўная праграма "Энергазберажэнне" на 2026-2030 гады. Яна прадугледжвае выкарыстанне цеплавых помпаў у сістэмах цеплазабеспячэння, другасных энергетычных рэсурсаў у прамысловасці і тэхналогій сонечнай энергетыкі пры вытворчасці і перапрацоўцы сельскагаспадарчай прадукцыі, а таксама павышэнне эфектыўнасці энергакрыніц з максімальным выкарыстаннем драўняных шчэпак і пелет у жыллёва-камунальнай гаспадарцы і рост энергаэфектыўнасці на аб'ектах сацыяльнай сферы за кошт электрыфікацыі канчатковага спажывання, комплекснай цеплавой мадэрнізацыі будынкаў і лічбавізацыі працэсаў энергаэфектыўнасці.
Дзяржпраграма таксама ўлічвае вытворчасць айчынных электрамабіляў, у тым ліку выкарыстанне суперхуткіх сістэм зарадкі электратранспарту з сістэмамі накаплення электрычнай энергіі, і ўкараненне тэхналогій сонечнай энергетыкі ў сацыяльнай сферы.
"Вынікам паспяховай рэалізацыі за апошнія 28 гадоў дзяржаўных праграм "Энергазберажэнне" стала эканомія паліўна-энергетычных рэсурсаў у памеры больш як 31 млн т умоўнага паліва, што эквівалентна скарачэнню выкідаў вуглякіслага газу на 44 млн т. Гэта значны ўклад энергазберажэння Беларусі ў прадухіленне глабальнага змянення клімату", - падкрэсліў Дзяніс Мілеўскі.
Было адзначана, што Беларусь стараецца прыцягнуць знешняе фінансаванне для інфраструктурных інвестпраектаў па энергазберажэнні і вядзе падрыхтоўчую работу для ўдзелу ў міжнародным гандлі квотамі на выкіды вуглякіслага газу па Парыжскім пагадненні, у тым ліку з улікам распрацаванай Міністэрствам фінансаў Канцэпцыі дзяржаўных зялёных аблігацый Беларусі, дасягнення мэт стратэгіі развіцця энергетычнага супрацоўніцтва дзяржаў - членаў Шанхайскай арганізацыі супрацоўніцтва да 2030 года, прынятай у ліпені 2024 года ў Астане, і з апорай на збліжэнне пазіцый дзяржаў - членаў Еўразійскага эканамічнага саюза ў рамках кліматычнага парадку дня.
У Абу-Дабі 12-13 студзеня прайшла 15-я сесія Асамблеі Міжнароднага агенцтва па аднаўляльнай энергіі (IRENA). У гэтым годзе асамблея сабрала больш за 1450 удзельнікаў, якія ацанілі прагрэс і намецілі дзеянні па паскарэнні глабальнага пераходу да аднаўляльных крыніц энергіі ў адпаведнасці з прынятым у 2023 годзе кансэнсусам ААЭ (патраенне аднаўляльных крыніц энергіі і павышэнне энергаэфектыўнасці ў два разы да 2030 года), парадкам дня ў галіне ўстойлівага развіцця на перыяд да 2030 года і мэтамі Парыжскага кліматычнага пагаднення.-0-
