6 ліпеня, Мінск /Кар. БЕЛТА/. Генеральная пракуратура прапануе надаць статус гісторыка-мемарыяльнага месца пахавання яшчэ шасці аб'ектам масавага пахавання ахвяр генацыду беларускага народа. Такая ініцыятыва прагучала на пасяджэнні міжведамаснай камісіі па ўвекавечанні памяці ахвяр генацыду беларускага народа ў гады Вялікай Айчыннай вайны, паведамілі БЕЛТА ў Генпракуратуры.
На пасяджэнні разгледжаны вынікі работы па ўстаноўцы памятных знакаў, прысвечаных ахвярам генацыду, і вызначаны месцы масавага пахавання ахвяр генацыду для надання ім статусу гісторыка-мемарыяльнага месца пахавання.
Генеральная пракуратура раней ініцыявала ўстаноўку ў кожнай вобласці памятнага знака ў месцы масавага пахавання перыяду Вялікай Айчыннай вайны, маючага асаблівае сімвалічнае значэнне для захавання гістарычнай памяці пра генацыд беларускага народа. У кожным з такіх месцаў знішчаны тысячы мірных грамадзян. Напрыклад, у Столінскім раёне Брэсцкай вобласці ўрочышча Стасіна з'яўляецца месцам расстрэлу 12,5 тыс. чалавек.
Члены камісіі заслухалі вынікі работы абласных і Мінскага гарадскога выканаўчых камітэтаў па ўзгадненні і ўстаноўцы ў такіх месцах памятных знакаў, а таксама выкананні мерапрыемстваў па добраўпарадкаванні пахаванняў, узвядзенні манументальных форм і азеляненні тэрыторый. Шэраг прадстаўнікоў выканаўчай улады пацвердзілі выкананне раней дадзеных даручэнняў.
На пасяджэнні Генеральная пракуратура ініцыявала разгляд пытання аб наданні шасці месцам масавага пахавання ахвяр генацыду беларускага народа статусу гісторыка-мемарыяльнага месца пахавання. Адным з такіх месцаў з'яўляецца сумна вядомае ўрочышча Іваноўшчына Лагойскага раёна, дзе нацысты і іх памагатыя ў гады Вялікай Айчыннай вайны знішчылі не менш як 1,5 тыс. чалавек.
Пасля абмеркавання члены камісіі аднагалосна падтрымалі ўнесеныя Генпракуратурай прапановы. Рашэннем камісіі вызначана ініцыяваць работу па прысваенні ім статусу гісторыка-мемарыяльных месц пахавання.-0-
